Kristoffer Dolmen lea virgáduvvon ođđa direktevran Sámi Dáiddaguovddážii Kárášjohkii.
Kristoffer Dolmen lea virgáduvvon ođđa direktevran Sámi Dáiddaguovddážii Kárášjohkii.
Kristoffer Dolmen lea SDG ođđa direktevra. Son álggii geassemánu 1. beaivvi, mearreáiggevirgái njealji jahkái.
– Mun illudan beassat viidásat ovdánahtit dáiddaguovddáža, cealká son.
Hárjánan kulturdoaimmaide
Kristoffer Dolmenis lea guhkit áigge bargoduogáš dáidda- ja kulturdoaimmas Davvi-Norggas ja maŋimuš áigge lea son bargan Nordlándda fylkkagieldda Dáidda- ja kulturjuohkima ráđđeaddin.
Dál son doaibmagoahtá ođđa direktevran Sámi Dáiddaguovddáža direktevran ja lohká illudit ođđa bargui.
– Mu sávaldat lea ahte Sámi Dáiddaguovddáš ain joatká buori čájáhusaiguin ja ahte bargat doaimmaiguin maid olbmot oidnet miellagiddevažžan, ja maiddái bargat ovttas eará institušuvnnaiguin sihke Norggas ja olgoriikkas. Sámi Dáiddaguovddážii lea dehálaš ahte sámi dáidda olaha viidát máilbmái. Mun illudan ovddidit guovddáža ovttas eará bargiiguin, dadjá ođđa direktevra Dolmen.
– Lean geahčestan nuorttas
Dolmenis leat leamašan maid stivradoaimmat AdLib Jazzklubbas, ParkArtas ja Ny Musikk-Bodøs.
Sus lea mastergráda hábmejeaddji kuráhtorgeavatlašoahpus ja cand. mag. gráda Bergen Universitehtas fágasurggiin dáiddahistorjá, kulturgáhtten ja kulturgaskkusteapmi.
Dolmenis lea maiddái museadieđaoahppu ja Cultural Management Stockholm Universitehtas, ja lassin vel Sámi kulturmáhttokursa mas deattuhuvvui Julevsámeguovlu.
– Mun lean aktiivvalaččat bargan Barentsguovllu fierpmádagain ja lean geahčastan nuorttas, erenoamážit jurdagiin ahte Davvikálohtta ja Davvioarje-Ruošša livčče miellagiddevaš ovttasbargoguovllut. Sápmi ja sámedáiddárat gullet guovddážii das, seammás gullet maiddái dáiddárat geat ásset davviriikkain ja geain lea gullevašvuohta sámi dáiddárbirrasii. SDG buori čájáhuslanjat Kárášjogas addet nana rámmaid čájáhusaide ja prográmmadoaimmaide. Seammás háliidan geahčastit olggobeale ovttasbargovejolašvuođaide viidábut ja gaskkustit čájáhusaid eará báikkiin, nu go dahkkui ovdamearkk dihte Tråante 2017:s ja documenta 14:s, čilge son virgái álgima oktavuođas.
