Finnmárkku fylkkagielda fylkkalávdegotti bokte háliida čielggadit man dehálaš buorre ja gelbbolaš fuolaheapmi lea. Dát lea gullevaš buot ássiide suohkanis, dákko bokte maid vuorrasiidfuolahus, dát lea maiddái dehálaš sápmelaččaide.
Guhkit áiggi lea beaggán ahte sámi vuorrasat vásihit hástaleaddji dili ovdamearkka dihte go giella láhppo buozalmasvuođa geažil.
Finnmárkku fylkkamánni lea bearráigeahččanlávdegoddi, Sámedikkis lea bajit ovddasvástádus sámegillii ja kultuvrii ja sámi suohkanat mat buohkat oidnet dárbbu, sihke dábálaš ja spesialistadearvvašvuođabálvalusas, eambbo buohccedivššáriidda geat hálddašit sámegiela ja geain maid lea sámi duogáš mii dávjá dárbbahuvvo go deaivvada olbmuin gii lea váttes eallindilis.
Golbma maŋemus jagi lea UiT Norgga árktalaš universitehta ovttasbarggus Sámi allaskuvllain bargan álggahit sámi buohccedivššároahpu Sámi allaskuvllas.
Ovdabarggut leat fágalaččat dorjojuvvon Finnmárkkubuohcciviesus ja leat maid ožžon ruhtadoarjaga sihke Finnmárkku fylkkamánnis, Sámedikkis ja Guovdageainnu suohkanis.
Finnmárkku fylkkalávdegoddi šálloša go oahppu ii leat vel álggahuvvon ja lea maŋiduvvon guhkit áigái ekonomalaš ákkaid geažil.
Oahppu livččii buorre ja mávssolaš vuohki háhkat studeanttaid sámi suohkaniin.
Oahppu maid livččii buorre sámegillii ja kultuvrraipmárdussii dálá dearvvašvuođa bargiide fylkkas, Davvi-Norggas ja miehtá riika.
Finnmárkku fylkkalávdegoddi áigu bivdit stáhta Máhttodepartemeantta bokte, Dutkama ja alit oahpu ministara Iselin Nybø, ruhtadit 2019 stádabušeahta bokte oahppoálggaheami.
