-Almmuhus-
-Almmuhus-
OĐĐASAT Sámi beassáš­márkaniid 50 jagi historjá galgá čalmmus­tahtto­juvvot

Sámi beassáš­márkaniid 50 jagi historjá galgá čalmmus­tahtto­juvvot

-

-

Sámi beassášmárkanat Guovdageainnus ávvudit 50 jagi 2021:s. Festivála bivdá olbmuid juohkit dieđuid, govaid, filmmaid ja fearániid beassážiin Guovdageainnus.

–  Prošeakta lea dehálaš Guovdageainnu ja sámiid historjádokumentašuvdnii, dadjá festiválabuvttadeaddji Elle Mari Dunfjell Oskal preassadieđáhusas.

Vuosttaš geardde 1971

Áillohaš (Nils Aslak Valkeapää) ja Guovdageainnu Sámiid Searvi lágidedje Sámi beassášmárkaniid Guovdageainnus vuosttaš geardde 1971:s. – 50 jagis lea olu dáhpáhuvvan. Máŋga buolvva leat vásihan beassášsuohttasiid ja olbmuin leat doaivumis olu govat ja fearánat. Mii háliidit gullat ja vurket dáid fearániid ja oaidnit govaid ja filmmaid. Dat bargu lea dehálaš historjádokumentašuvdna sihke Guovdageidnui ja Sápmái. Mii sávvat olbmot háliidit juohkit dieđuid minguin, joatká Dunfjell Oskal.

Sihkkarastit arkiivačoakkáldaga

Sámi Musihkkafestivála lea jo čohkkegoahtán govaid ja dieđuid. Fargga álgit maiddái jearahallat olbmuid geat leat leamaš guovddážis Beassášmárkaniid lágideamis. Prošeaktabargu lea maiddái dehálaš vai sihkkarastit arkiivačoakkáldaga festivála viidáset ovdáneapmái.

Galgá šaddat govvačájáhussan

Vuosttažettiin lea mihttu ráhkadit govvačájáhusa mii rahppo Beassášmárkaniid 2021 doaluin.

– Viidáseappot beassat oaidnit lea go vejolaš viiddidit ja ovdánahttit prošeavtta ja ráhkadit ovdamearkka dihte ávvugirjji mas leat sihke govat, dieđut festivála birra ja olbmuid fearánat. Soaitit sáhttit dokumentárafilmma maiddái ráhkadit. Deháleamos lea ahte prošeakta boahtá álbmogii buorrin, muitala Mari Dunfjell Oskal.

Ovddos dorjon 

Ovddos lea dorjon prošeavtta 200 000 ruvnnuin.

– Dáinna doarjagiin beassat earret eará oastit rusttegiid maiguin sáhttit ieža digitaliseret govaid. Dainna lágiin eai dárbbat olbmot sin iežaset govvaálbumiid luoikat, muhto mii sáhttit scannet govaid dasttánaga. Doarjja galgá maid gokčat goluid go digitaliseret filmmaid ja go ráhkadit govvačájáhusa. Ovttasbargoguoimmit leat Sámi arkiiva ja RiddoDuottarMuseat.

-Almmuhus-