Ketil Kjensetha mielas lea áigi boahtán ahte sámi aktevrrat fátmmastuvvot go bieggafápmoáššiid galget meannudit.
Disdaga mearridii Stuoradikki energiija- ja biraslávdegotti eanetlohku ahte boazodoallu ja sámi aktevrrat galget fátmmastuvvot eambbo bieggafápmoáššiin, árabut. Ketil Kjenseth (G) oaivvilda dál lea áigi.
– Mun lean hui ilus go mii gárttaimet ovttaoaivilii ahte sis, geat čielggadit áššiid, galgá boazodoallogelbbolašvuohta. Biddjojit čielga čanastusat dasa ahte boazodoalu čohkkejuvvon váikkuhusat galget árvvoštallot ja deattuhuvvot konsešuvdnameannudeamis, dadjá Kjenseth, gii jođiha energiija- ja biraslávdegotti, preassadieđáhusas.
Ovttaoaivilvuohta boahtá «Vindkraft på land» meannudeami oktavuođas, Stuoradikkis, mas Gurut, Olgeš, Risttalaš álbmotbellodat, Bargiidbellodat ja Guovddášbellodat leat ovttas.
– Bieggafápmohuksen ii galgga mannat luonddu iige álgoálbmogiid rivttiid ovdii. Mihttu lea ráhkadit ráinnas energiija ja unnidit dálkkádatgássaluoitima, ii fal bilidit dehálaš árvvu. Ovddos guvlui mii áigut guldalit sámi aktevrraid ja boazodoaloealáhusa, dadjá Kjenseth.
Dát ášši galgá digaštallojuvvot Stuoradikkis juovlamánu 1. beaivvi.
