Sámiráđđi lea bargamin Sámi Duodjemearkka ođasmahttimiin. Ulbmil bargguin lea suddjet duoji ja sámi designa, ja maiddái buoridit duoji ja sámi designa gálvomearkan.
Sámiráđđi ásahii Sámi Duodjemearkka 80-logus sámi duoji gálvomearkan.
– Ulbmil lei earret eará suodjalit sámi duoji áddestallama ja soahpameahttun gilvaleami vuostá ja čujuhit ostiide ahte gálvvu lea ráhkadan sápmelaš, dieđiha Sámi Duodjemearkka prošeaktajođiheaddji, Ellen Berit Dalbakk, Sámiráđi preassadieđáhusas.
– Dálá mearka ii doaimma nu go galggašii
– Sámiráđđi oaivvilda ahte Sámi Duodjemearka ii doaimma dál nu go galggašii. Ovttas duodjeorganisašuvnnaiguin ja sámedikkiiguin mii háliidat hukset buoret struktuvrra mearkka birra, sihke juridihkalaš ja kommersiálalaš, dadjá prošeaktajođiheaddji Dalbakk, gii lea Skániin eret ja lea ieš duojár.
Árvolassáneapmi lea buorre sámi servodahkii
Prošeakta lea dál ovdaprošeaktan, ja Sámiráđđi gulahallá duodjebirrasiiguin gávnnahan dihte movt galgá joatkit bargguin.
– Oassi barggus dán dásis lea maiddái buoridit duoji gálvomearkan. Ulbmil lea earret eará ahte turisttat geat bohtet Sápmái galget diehtit ahte mearka gávdno juo ovdal go sii bohtet; sii galget háliidit oastit duoji ja sámi designa main lea Sámi Duodjemearka. Sámiráđđi háliida doarjut árvolassáneami sámi servodaga buorrin, dadjá Dalbakk.
Bovde duodjeorganisašuvnnaid ovttasbargui
Oassin barggus Sámiráđđi lágida gulahallanseminára «Mo suddjet duoji?» Anáris disdaga miessemánu 22. beaivvi. Beivviid maŋŋil gulahallanseminára lágiduvvo Sámi njálmmálaš árbevieruid konferánsa Anáris, mas lágideaddjit leat sámedikkit ja Sámiráđđi.
– Midjiide lea áibbas dehálaš oažžut oaiviliid ja oainnuid sámi servodagas dán barggus. Mii háliidat gulahallat duodjeorganisašuvnnaiguin, duojáriiguin, earáiguin geain lea seammá ulbmil ja eará berošteddjiiguin. Mii fertet ovttasbargat nu ahte Sámi Duodjemearka šaddá ávkin sámi servodahkii, nanne Dalbakk preassadieđáhusas.
EU-doarjja duodjemerkii
Sámiráđi bargu ođasmahttit Sámi Duodjemearkka lea ožžon ruhtadoarjaga EU-prográmmas «Northern Periphery and Arctic Programme». Prográmma háliida ahte álgoálbmotprošeavttat galget ohcat ruhtadoarjaga sis, ja Sámiráđđi hástá earáid iskat prográmma.
Sámiráđđi lea juo čađahan ovtta prošeavtta Sámi Duodjemearkka revitaliserema ektui. Das čađahuvvui 2015:s ja 2016:s ja oaččui Norgga beale Sámedikkis ruhtadoarjaga.
