Girona gielddaválggaid oktavuođas Sámelistu bellodagas sávve oažžut golbma mandáhta, muhto bohtosat čájehit ahte bellodat ain joatká guvttiin mandáhtain.
– Dieđusge, álo vuordit bohtosiid lassánit jagis jahkái ovddit válggaid ektui. Muhto go geahčan dan birrasa mii lea dáppe min Sámis, de eai soaitte lassánit nu olu jienasteaddjit. Goitge doivon ahte mii leimmet oažžut eanet jienaid ja soaitit vel golbma mandáhta, dadjá Sámelisttu bellodaga nubbeevttohas Per-Olof Nutti NRK Sámi «Buorre iđit» sáddagis odne iđđedis.
Sotnabeaivvi, čakčamánu 11. beaivvi, čađahuvvojedje Ruoŧa válggat Riikabeaivái, gielddaide ja regiovnnaide. Girona gieldda válggaide leat maid leamaš Sámelisttu bellodaga evttohasat mielde gieldda politihka váikkuheapmái. Vuosttaš namma bellodagas lea Sámiráđi ovddeš presideanta, Åsa Larsson Blind. Nubbeevttohas lea Ruoŧa Sámedikki ovddeš ságadoalli, Per-Olof Nutti.
Molsašuvvame
Sámelistu lea leamaš Girona gielddaválggain 2006 rájes. Das rájes sin bellodat lea álo nagodan oažžut gielddastivrii guokte ovddasteaddjii. Nu maiddái dahke dan háve. Sámerádio gráfalaš dieđuid mielde dán jagáš gielddaválggaid oktavuođas oaččui Sámelistu 4,8 proseantta mii lea 0,7 proseantta eanet go ovddit válggain njealji jagi dassái.
Bohtosat, maid dan rádjái leat almmuhan, muitalit ahte Girona gielddaválddaid stuorimus vuoiti lea Sosiálademokráhtaid bellodat, oažžu 41,1 proseantta. Dat lea 15,9 proseantta eanet go ovddit gielddaválggain.
Guovddášbellodat fas massá olu jienasteddjiid doarjága. Bellodat oažžu 9,7 proseantta Girona gielddaválggain dán jagi. Ovddit gielddaválggaid ektui de masset 23,2 proseantta. Guovddášbellodat šaddá Girona gielddaválggaid stuorimus vuoittáhalli.
Ovddit mandáhtas Sámelistu barggai ovttas Sosiálademokráhtaid bellodagain.
Loahpabohtosiid galget almmuhit easka gaskavahku, čakčamánu 14. beaivvi. Dan rádjái leat lohkon 92 proseanta jiena.
Ávvir geahččalii oažžut Sámelisttu politihkára ságaide muhto ii lihkkostuvvan.
