Risten Turi Aleksandersen virgáibiddjo fásta virgái Sámedikki giellaossodaga ossodatdirektevran.
Dan mearridii Sámedikki politihkalaš virgáibidjanlávdegoddi čoahkkimis gaskavahkku.
– Ledje máŋga buori ohcci ja lean hui duhtavaš Risten Turi Aleksandersena virgáibidjamiin giellaossodaga direktevran. Sus lea nana fágalaš duogáš ja rivttes bargohárjáneapmi. Sus lea máŋggabealat hárjáneapmi, ja sus lea máhttu ja dovdu giellaovdánanbargguin ja giellapolitihkalaš hástalusaide olles sámi servodagas, dadjá Sámedikki direktevra Inger Marit Eira-Åhrén preassadieđáhusas.
Risten Turi Aleksandersen (42) bargá dál Sámi girkoráđi váldočállin. Dasa lassin lea son boazodoalli ja lea orohat 14 Sállira jođiheaddji. Son lea Guovdageainnus eret, muhto orru dál Sálliris Romssas.
