Sámediggi juolluda NuorajTV doibmii 300.000 ruvnnu vai eanet nuorat beroštišgoađášii oahpahallat julevsámegiela.
Sámediggi juolluda NuorajTV doibmii 300.000 ruvnnu vai eanet nuorat beroštišgoađášii oahpahallat julevsámegiela.
Vahkku áigi ilbmagohte fas ođđa NuorajTV prográmmat YouTube neahttabáikái.
Sámediggeráđđi juolluda 300.000 ruvnnu ođđa buvttadeaddjái.
– NuorajTV sáhttá movttiidahttit eambbosiid oahpahallat ja geavahišgoahtit julevsámegiela, dadjá sámediggepresideanta Aili Keskitalo preassadieđáhusas.
Ođđa ásahuvvon fitnodat
NuorajTV prográmmat leat ráhkaduvvon 2010 rájes, muhto ovdalaš jahkemolsuma koŋkánii Julev Film AS mas ledje vuoigatvuođat ráhkadit ja sáddet prográmma.
Dál lea NuorajTV AS oastán vuoigatvuođaid ja buvttadišgoahtán NuorajTV.
Bivnnut prográmma
2010-2015 ráhkaduvvojedje 230 NuorajTV prográmma ja máidnosa mat čájehuvvojit YouTubes.
Masá 180.000 olbmo leat dáid geahččan dássážii, gaskamearálaččat leat juohke prográmmas 800 geahčči.
– Logut čájehit ahte NuorajTV lea bivnnut julevsámi mánáid ja nuoraid gaskas. Lea hui dehálaš ahte julevsámegiella gullo ja oidno sosiála mediain. Dáinna lágiin badjána giela árvu, ja danin lea dehálaš ahte NuorajTV ain buvttaduvvo julevsámi mánáid ja nuoraid várás, lohká Keskitalo.
Sámediggeráđđi juolluda ruđaid NuorajTV buvttadeapmái go jáhkket prográmma movttiidahttit eambbo mánáid ja nuoraid oahpahallat ja hállagoahtit julevsámegiela. Šearbmagovva: YouTube
