-Almmuhus-
-Almmuhus-
KULTUVRASámediggeráđđi doarju Hans Ragnar Mathisena dáiddačoakkáldaga áimmahuššama

Sámediggeráđđi doarju Hans Ragnar Mathisena dáiddačoakkáldaga áimmahuššama

-

-

Earenoamáš vejolašvuohta gozihit sámi dáidda- ja kulturriggodaga maŋit áigái.

Elle-Hánsa/Keviselie/Hans Ragnar Mathisen addá dáiddačoakkáldaga Árran julevsámi guovddážii, vai dat bissu oktan čoahkkádussan. Dáiddára ja Árrana gaskka lea čállojuvvon šiehtadus. Dáidagiid lohku lea árvvoštallon leat 15 000.

Váldoáššis leat dáiddačoahkkádusas govvadáidagat ja birrasii 40 giehtatevdnejuvvon kártta iešguđege báikkiin Sámis.

 

Gozihit sámi dáidda- ja kulturriggodaga


Sámediggeráđi Silje Karine Muotka. Govva: Kenneth Hætta.

Sámediggeráđđi oaivvilda ahte prošeavtta bokte lea earenoamáš vejolašvuohta gozihit sámi dáidda- ja kulturriggodaga maŋit áigái ja dasa lassin sáhttá leat vejolašvuohta ráhkadit sihke bissovaš ja gaskaboddosaš čájáhusaid.

– Elle-Hánsa/Keviselie/Hans Ragnar Mathisen lea dovddus sámi dáiddár ja dán oktavuođas lea stuorra servodatávki go su dáidda gozihuvvo dohkálaš vuogi mielde boahtteáigái, ja earenoamážit lea dehálaš ahte dát suodjaleapmi čoahkkádussan addá sámi servodagaide buoret vejolašvuođa gaskkustit dáidaga boahtteáiggi sohkabuolvvaide, dadjá sámediggeráđi Silje Karine Muotka preassadieđáhusas.

 

Olles eallima čoakkáldat

Dáidda lea dáiddára olles eallima čoakkáldat.

Elle-Hánsa/Keviselie/Hans Ragnar Mathisen lea searvan mearihis ollu čájáhusaide ja su dáidaga leat oastán ollu almmolaš ásahusat, earret eará Nationálamusea dáidaga várás. 2017:s lei son ovddastuvvon Documeanttas, maid ollugat rehkenastet ođđaáiggi dáidaga máilmmi deháleamos čájáhusarenan.

200 000 ruvdnosaš doarjaga ulbmilin lea sihkkarastit ahte dáiddaskeaŋka dohkálaččat fievrriduvvo, registrerejuvvo ja biddjojuvvo magasiidnii.

-Almmuhus-