Dan oaivvilda Suoma beale Sámedikki ságajođiheaddji, Tuomas Aslak Juuso, lea sivvan dasa go sámediggeláhkaevttohusa gieđahallan bissehuvvui vuođđoláhkaváljagottis.
Sámediggeláhka ođasteapmi bissánii riikabeivviid vuođđoláhkaváljagottis guovvamánu 24. beaivvi dan jagi. Sámedikki ságajođiheaddji, Juuso lea čállán viiddes oppalašgeahčastaga oainnuidis birra, das mo maŋimus sámediggelága ođasmahttingeahččaleapmi gopmánii Riikabeivviid vuođđoláhkaváljagottis. Juuso muitala suomagielat teavsttastis dárkilabbot das, mo Sámediggi vikkai ráđđádallat čovdosa maŋimuš rádjai.
– Háliidin, ahte buohkat sáhtášedje gullat mii proseassa áigge dáhpáhuvai, ja doaivvunge, ahte nu máŋggat áššis beroštuvvan olbmot go vejolaš, vedjet lohkat deavstta, dadjá Juuso preassadieđu bokte.
Juuso atná vahágin erenomážit dan, ahte guovddášbellodat, mii vuostálasttii láhkaevttohusa, ii háliidan ráđđádallat čovdosiin.
– Lea vahát ja imaš, ahte guovddášbellodaga ságajođiheaddji Annika Saarikko ii miehtan deaivvadit min oktiige. Gádden ahte dan ášši birra ságastallan, man sii oidne ovdáneami easttan, livččii leamaš sin mielas dárbbašlaš, vai livččiimet sáhttán juobe geahččalitge gávdnat čovdosiid, Juuso imaštallá.
Sámediggelága ođasmahttin lea dál gopmánan golmma ráđđehusa áigge maŋŋálagaid. Maiddái ON olmmošvuoigatvuođakomitea ja nállevealahankomitea leat geatnegahttán Suoma divvut dálá lága gudnejahttit sámiid iešstivrenvuoigatvuođaid earet eará válgalogahallama kritearaid oasil.
