Dáloniidlisttu sámediggeáirras Issát Máhtte O. Hætta sáhttá gádjut «NSR-ráđi».
Dáloniidlisttu sámediggeáirras Issát Máhtte O. Hætta sáhttá gádjut «NSR-ráđi».
Diimmu ovdal jienasteami leat bellodagat vázzimin luhčabálgáid Sámedikki kantuvrraid gaskka ja bellodagat suokkardit strategiijaid jienasteapmái.
Jienasteapmi álgá diibmu 15:00.
Molson «guohtuma»
Nu go lea jo beaggán ovdalaš, ahte Bargiidbellodat ovttas Árjjain ja Olgešbellodagain áigu háhkat eanetlogu gomihit NSR-ráđi bušeahttaevttohusa.
Dasa lassin galge Åarjel-Saemiej Gielh ja Sámit Lulde bellodagat doarjut sin ođđa evttohusa.
Ovdalaš go jienasteapmi álggii de goittot galggai Sámit Lulde bellodat molson oainnu ja njuiken NSR beallai ja dán duođaštii Árjja áirras Laila Susanne Vars.
Dát dattege ii doallan deaivása, ja Sámit Lulde finai sárdnestuolus muitaleamen ahte dorjot Bargiidbellodaga bušeahta.
Váilot áirasat
Dasa lassin váilot guokte áirasa jienasteamis, mii maiddái sáhttá dagahit váttisvuođaid.
Bargiidbellodagas váilu okta ja Ovddádusbellodagas váilu okta.
Dáloniidlisttu áirras Issát Máhtte O. Hætta lohká beannot diimmu ovdal jienasteami sáhttit bohtosa šaddat vaikko mo.
Šiehtadus
Dán guovtti stuorámus bellodagas leage agibeaivvi leamaš šiehtadus, mii guoská lonohallamii.
Jus nuppi bellodagas váilu áirras dievasčoahkkimis, de galgá nubbi maiddái váldit eret ovtta áirasa jienasteamis.
Dát goittot ii leat mihkkige njuolggadus čoahkkinortnetbáhpáriin, mainna rihkkot lága dahje njuolggadusaid, jus eai dán háve vuhtii váldde dan.
Ferte oaidnit
Dáloniidlisttu áirras rámidii sárdnestuolus Bargiidbellodaga bušeahttaevttohusa ja rissii NSR bargovuogi, muhto Hætta ii muital goappá evttohusa son jienasta.
Bargiidbellodat goittot lea rehkenastán su doarjut iežaset evttohusa.
– Mun ferten oaidnit obbalaš dili ja dan vuođul jienastit. Mun in sáhte dovdduiguin jienastit, muhto dan vuođul mii orru jierpmáleamos, dadjá son oanehaččat.
