Guovdageaidnulaš Per Aune Buljo navdá dán jagáš gilvvu šaddat ollu losit diimmá ektui. – Mihttu lei buoridit diimmá áiggi, muhto orro oalle váttis, dadjá son beaivvi ovdal gilvvuid.
Team Beazedievva MTB, mas Per Aune Buljo ja Geir Jøran Sara sihkkelastiba, duolmmaiga diimmá OF-300-gilvvu jándoris. Dán jagi ii loga Buljo jáhkkit mannat nu jođánit.
– Gal dál lea leamaš hui heajos dálki olles geasi ja hui njuoskkas. Mun jáhkán dán jagi leat mihá losit, iige boađe mannat nu jođánit, navdá son.
Oahpásnuva Team Beažedieavva MTB joavkkuin dáppe.
Duoddara gilvu
Diibmá leiggage Per Aune Buljo ja Geir Jøran Sara hástalan Kárášjoga albmáid Jonas Gulsrud ja Jørn Mikael Eriksen Engstad «Duoddara gilvui» Offroad Finnmark gilvvuid oktavuođas ja dan soai nagodeigga álkit vuoitit.
Soai bođiiga 19. sadjái ja leigga buoremus sámi joavku gilvvus.
– Jus fal kárášjohkalaččat leat mielde gilvvus, de lea álo «Kampen om vidda», dahje duoddara gilvu singuin, čaimmiha Buljo.
Jonas Gulsrud muitaliige diibmá maŋŋel gilvvuid, sudno gilvoguimmiid bártidan ollu sihkkeljuvllain ja dán sivas geavaheigga nu guhkes áiggi gilvvus ja maiddái vuoittáhalaiga «Duoddara gilvvus».
Dán jagi lea Kárášjoga sihkkelsearvvi joavkku Jonas Gulsrudas ođđa gilvoguoibmi, Kato Norvang.
Oahpásnuva Kárášjoga sihkkelsearvvi joavkkuin dáppe.
Ballá galbmot
Vaikko dálkedieđáhus lea lohpidan lieggaset dálkki duorastaga rájes, de ii loga Buljo dan goittot nagodit goikadit mađiija.
Seammás dovddasta son veahá balu gilvui, mii soaitá šaddat oalle hástaleaddjin.
– Dat gal veahkeha jus lieggaset šaddá. Mun balan veahá ahte šaddá lossat, muhto balan eanemus galbmot, go dat gal lea váivi, dovddasta son.
Loga maid: Oahpásmuva sihkkelastiide
Buori vuoimmis
Guovdageaidnulaš Per Aune Buljo, gii orru Álttás, goittot illuda duorastateahkedii go gilvu álgá diibmu 18:00.
Dán jagi leat eambo joavkkut dieđihuvvon gilvui, diimmá ektui.
Buljo ii loga iežas ráhkkanan eambo go diimmá gilvvuid ovdal, muhto lohká iežas muđui leamaš dearvvaš ja nagodan garvit bárttiid.
– Sihkkelastán mun in leat nu ollu ja kilomehterat leat čoggon dušše badjelaš 900, muitala son.
Son goittot lohká iežas čuoigan ja viehkan dálvvi miehtá ja dovdá iežas leat buori vuoimmis.
Dehálamos čađahit
Álgomihttu Beazedievva MTB joavkkus lei buoridit diimmá áiggi, muhto leaba šaddan veahá muddet dan ovdalaš gilvvuid.
– Dat lei munno álgomihttu, muhto moai oidne ahte ean boađe dan gal nagodit heajos siivvu geažil, čilge son.
Dehálamos váldomihttun lohká goittot guovdageaidnulaš alddis čađahit gilvvu bárttiid hága ja joavdat mollii.
