Sámepolitihkkár Andrei Danilov vuostálastá iežas riikka soahtedaguid Ukrainas ja dadjá ahte dan geažil ii leat sutnje oadjebas orrut Ruoššas.
Ruošša sámepolitihkkár Andrei Danilov vuostálastá soađi man su ruovtturiikka lea álggahan Ukrainas, čállá NRK Sápmi.
– Munnje lea menddo váralaš orrut Ruoššaš. Mun lean muhtin dorvoohcciidguovddážis Norggas ja áiggun dáppe ohcat dorvvu, muitala Danilov videos maid lea almmuhan Facebookas.
Ruošša eiseválddit gohčodit soađi dárbbašlaš militearalaš doaibman, eai ge dohkket ahte álbmot vuostálastet soahtedaguid.
Váikkuha ovttasbargui
NRK ii leat lihkostuvvan oažžut Andrei Danilova ságaide maŋŋel go almmuhii video, muhto son lea árabut dán vahkkus muitalan ahte ii doarjjo soađi.
– Mun vuosttaldan sođiid miehtá máilmmi. Dat mii dál dáhpáhuvvá Ukrainas váikkuha garrasit sápmelaččaid rájáhis ovttasbargui go dál han giddejit rájáid.
Danilov lea Guoládaga sámepolitihkkár ja sámeaktivista. Sus leat iešguđetge luohttevašdoaimmat sámeservviin ja son lea Sámiráđi kulturlávdegotti láhttu.
