– Okta hui dárbbašlaš ja mávssolaš oassi olbmuide servvodagas dat gal lea dan nai listtu prográmmas vajálduvvon ja duvdiluvvon doaresbeallái, nu go buot eará listtuin, čállá Ellen Márjá Turi Gaup dán lohkkiidčállosis.
Dál lea válggaid áigi, muhto hui unnán šurru válggaid birra, iige oidno iige gullo báljo oktage politihkkar. Muhto odne fitne dáppe mu viesus Mieronis Johttisámi listtu njunušolbmot. Dál lean ožžon Ávjovári Johttisápmelaččaid listtu ja prográmma.
Ferten dadjat juste nu mo mun oainnán dan. Dat lea bures ráhkaduvvon ja hutkojuvvon, min čeahpes ja áŋgiris politihkkáriin. Muhto okta hui dárbbašlaš ja mávssolaš oassi olbmuide servvodagas dat gal lea dan nai listtu prográmmas vajálduvvon ja duvdiluvvon doaresbeallái, nu go buot eará listtuin. Dat leat kristtalašvuođa árvvut, Ipmil bassi sáni oahpahus ja árvvut. Otná áiggis ja otná servvodagas livččii ja lea dat oassi maid áibbas dárbbašlaš ja šattašii šerrejuvvot min čeahpes politihkkáriin ja livččii namahuvvon prográmmas juohke čuoggás, jurddašan mun, ja sávan ahte Ipmil áhči sáddešii ja attášii politihkkariidda dan čuovgga ja otná servvodagas ii bázahala ja áibbas láhppo.
Otná áiggis ja otná servvodagas livččii ja lea dat oassi maid áibbas dárbbašlaš ja šattašii šerrejuvvot min čeahpes politihkkáriin ja livččii namahuvvon prográmmas juohke čuoggás,
Ellen Márjá Turi Gaup
Dat lea nu ruojus ja seavdnjat go kristtalašvuođa árvvut ja Ipmil sátni iige báljo namuhuvvoge šat, dego livččii áibbas dušši.
Boazosámit leat álo geavahan Ipmil sáni buolvvas bulvii, dan mii goit berret buohkat diehtit, muitit ja vuhtii váldit. Ja Ipmil sátni dat goit galggai leahkit vuođđun olbmo eallimis, bargguin, birgejumis ja buot. Ja mun gal doaivvun ja dieđán ahte dat ovddit buolvva olbmot goit leat oahpahan min ahte olmmoš ferte ja galgá dorvvastit Ipmil sátnái, giitit Ipmil áhči buot ovddas mii dus lea, ja buot dan ovddas maid don leat ožžon Ipmil áhčis, sihke ilu ja nu maid morraša ovddas, mii lea min oahppu leamašan boazosámis ja dan mii eat galgga bálkestit ja hilgut. Dan birra mii fertet dál álgit jurddašit, muittohallat ja guorahallat ja geavahit Ipmil sáni veahkkin, dat lea dárbbašlaš ja ávkkálaš olbmui.
Dat lea nu ruojus ja seavdnjat go kristtalašvuođa árvvut ja Ipmil sátni iige báljo namuhuvvoge šat, dego livččii áibbas dušši.
Ellen Márjá Turi Gaup
Dál leat gal váttis áiggit mas mii eallit go olles min riika ja buot dat davviriikkat eai oro šat berošteame ja oaidnime árvvu Ipmil sánis ja kristtalašvuođas go Ipmil sáni oahpahus lea váldon eret sihke skuvllain ja almmolaš báikkiin ja nu dat nohká ruovttuin maid ja obanassiige olles servodagain juohke guovllus. Ja báhkinvuohta njáhká vel min nai boazosámiid unna servodagažii ja viggá báidnit visot. Mun háliidan gal namuhit daid min čeahpes ja áŋgiris politihkkariid ja ovddasteddjiid Johttisápmelaččaid listtus ja eará sámi listtuin maid ahte eai galggaše min politihkkarat guođđit kristtalašvuođa ja Ipmil sáni árvvuid namuheamis, dat lea dárbbašlaš.
Jus kristtalašvuođa árvvuid hilgut ja guođđit, de šaddá guorosvuohta mii deavdá johke báikki iige šat lihkostuva mihkkege albmalahkái. Ipmil bassi sátni lea hui divrras dávvir. Ipmil sáni bokte lea buot sivdniduvvon, ja dan bokte bajásdollojuvvo ja bisuhuvvo buot. Ja nu guhká go mis lea Ipmil buressivdnádus, de lea mis visot, buot maid mii dárbbašit sihke dearvvašvuohta, birgenláhki, bargomokta ja eallinmokta.
Mis leat olu fiinna, čeahpes ja árjjalaš nuorat geat leat gásttašuvvon dainna bassi gásttain maid Jesus Kristus lea ásahan, dan golmma oktalaš Ipmila nammii. Jus sii eai beasa oahppat Ipmil sáni neavvagiid, de sii gal báhcet áibbas guorosvuhtii. Sii berreše maid muittuhuvvot Ipmil sáni oahpahusa eai galggaše hilgut. Muhto dan berre olmmoš álo geavahit, mánát gullat, girkus, lohkamiin, sotnabeaiskuvllas ja ieš maid lohkat vai ii vajálduhte. Áhččemin rohkosa lea dárbbašlaš lohkat. Ipmil sátni galggašii leat vuođđun eallimii, bargguide, oahpuide, ásahusaide, ealáhusaide ja bargosajiide.
