Riikageaidnu 93 lea evttohuvvon šaddat oassin Europageaidnu 45:ain.
Riikageaidnu 93 lea evttohuvvon šaddat oassin Europageaidnu 45:ain.
Gaskavahkku deaivvadedje njealji riikkaid johtolatministariid ovddasteaddjit Roavvenjárggas ságastallat rádjeluottaid ovdáneami. Dehálaš mihttu ovttasbargguin lea ahte riikat ovttas mearridit guđe rádjeluottaid galget vuoruhit, nu ahte čuovvoluvvo našunála investeremiid.
Riikageaidnu rievda Europageaidnun?
Eanemus lassáneapmi johtolagas lea Rv93 gaskal Álttá ja Palojoga. Dán luddii lea plánejuvvon báktesisgeaidnu Silisávžžis Guovdageainnu ja Álttá gaskkas. Dál evttohuvvo ahte geaidnu galgá šaddat E45 geaidnun, ja dainnalágiin guhkiduvvo váldoluodda E45 mii dál manna Ruoŧas davás.
Nubbin eanemus lassáneapmi johtolatluottain lea E8 Romssa ja Durdnosa gaskkas.
Oassi kárttas Stáda geaidnodoaimmahaga neahttasiiddus. Rv93 evttohuvvo šaddat guhkiduvvon oassin E45 luottas.
Norga, Suopma, Ruoŧŧa ja Ruošša
Dát njealji riika leat mielde pláneme rádjeluottaid, ja čájehuvvo ahte njuolggadusat dáin riikkain leat iešguđetláganat vuojániid guhkkodaga ektui, deattu ja allodaga ektui. Dat lea dagahan váttisvuođaid guorbmebiillaide. Olggosgolut lassánit go eai beasa lagamus luottaid rasttildit ja dušše guovtti rádjestašuvnnain lea rabas birrajándora.
Rádjegeainnut maid áigot vuoruhit:
E12 Måeffie – Upmije
Riikageaidnu 77 Bådåddjo – Skiellehte
E10 Narviika – Luleju
E8 Romsa – Duortnus
Riikageaidnu 93 Áltá – Palojohka
Riikageaidnu 893 Njávdán – Roavvenjárga
E105 Girkonjárga – Murmánska
Ruošša jođiha plána viidáset
Ruošša váldá ovddasvástádusa čuovvolit Oktasaš Barents johtolatplána dál go Suopma lea jođihan dan guokte jagi. Johtolatplánas galgá ovdánahttit ja buoridit luottaid ja gálvodoalvumiid nu ahte márkan ovdána Barentsguovllus. Dáid dieđuid buktá stáda geaidnodoaimmahat preassadieđáhusas.