Dál eai leat šat beare gallis geat vižžet reaidaruđa minibáŋkkus. Diibmá njiejai ruhtaviežžan minibáŋkkus 15 proseanttain Davvi-Norggas.
Dál eai leat šat beare gallis geat vižžet reaidaruđa minibáŋkkus. Diibmá njiejai ruhtaviežžan minibáŋkkus 15 proseanttain Davvi-Norggas.
Eai leat go ribat vel báhcán lummaide dán áigge. Go okta ge jearrá lea go dus ruhta badjelasat, de eat sáhte lohkat juo, go dán áigge mákset Vippsain gálvvuid.
Juohke jagi njiedjá reaidaruđa johtu Norggas, dan sivas go olbmot šaddagohtet eanet digitálat ruđa ektui, čállá Seastinbáŋku1 preassadieđáhusas.
– Mii oaidnit ahte ii leat šat seamma stuora dárbu reaidaruhtii go ovdal lei. Olbmot geavahit minibáŋkku hárve, lohká Davvi-Norgga SeastinBáŋku1 gulahallanhoavda Stein Vidar Loftås.
Nuorat geavahit koartta
Sivvan manne ruhtaviežžan lea njiedjan 15 proseanttain, lea go mánáin ja nuorain lea sierra báŋkokontu ja sii maid ožžot máksinkoarttaid.
– Oaidnit dál ahte mánát geavahit máksinkoarttaid eanet go ovdal. Ollu 10-jahkásaččat mákset koarttain go leat rámbuvrras, muitala Loftås.
Minibáŋkkuid heaittihit miehtá Norgga
SeastinBáŋkkus leat 76 minibáŋkku Davvi-Norggas, ja lohku lea bisson dássedin maŋemus golbma jagi.
2015:s ledje 1950 minibáŋku, ja jagi maŋŋel ledje 1679 minibáŋku.
Mobiila álo fárus
2,7 miljovnna norgalačča leat viežžan Vipps appa, ja juohke beaivvi leat eambbogat geat álget geavahit dan. Dan ovdii go viežžat ruđa minibáŋkkus ja máksit vealggi nubbái, de sáhttit dán áigge sáddet ruđa Vippsa bokte. Dalle go fertiimet reaidaruđa viežžat vai sáhttit gávppašit herskkuid miessemánu 17. beaivvi, de mii máksit Vippsain gálvvu ovddas.
– Min dábit leat oalát rievdan. Mobiila lea álo min fárus, ja lea olu álkit sáddet ruđa nubbái Vippsa bokte, go vázzit minibáŋkui. Dál leat eambbogat geat álget dan geavahit, ja reaidaruđa dárbu unnu, muitala Loftås.
