Sámediggeráđđi lohká dáhpáhusa muittuhussan ahte sámevášši lea servodatváttisvuohta.
Sámediggi čállá preassadieđáhusas ahte golggotmánu 29. beaivvi vásihii Rita Helmi Toivosdatter Laakso ahte golbma iešguđet biilavuoddji cielahedje su, go lei gáhtas vázzime Sámi giellavahku doaluide maid Innlandet allaskuvla lágidii. Earret eará sutnje čurvo «lappjævel». Sámediggeráđđi Runar Myrnes Balto (NSR) reagere garrasit dasa.
– Dat lea dieđusge áibbas dohkketmeahttun dáhpáhus, ja mii fas muittuha ahte sámevašši lea stuora servvodatváttisvuohta Norggas. Háliidan rámidit Laakso go rahpasit muitala iežas vásáhusa birra, ja dasto maiddái veahkeha čuvget dan váttisvuođa, dadjá Myrnes Balto.
Áigot nannet áŋgiruššama
Sámediggepresideanta Silje Karine Muotka (NSR) lea aiddo lokten barggu sámevaši vuostá Sámediggeráđi ođđa áššesuorgin, mas mihttu lea nannet Sámedikki áŋgiruššama. Runar Myrnes Balto, geas lea dan ášši ovddasvástádus ráđis, oaivvilda ahte Innlandet allaskuvla dál lea buorren ovdamearkan earáide.
– Allaskuvlla dekána jođánit signaliserii ahte áigot eambbo bargat dan ovdii ahte fuomášuhttit sámevaši iežaset oahpaheaddjeoahpus. Dat lea mu mielas hui buorre mearka, ja maiddái eará oahpahusásahusaide buorren ovdamearkan maid sáhttet čuovvulit. Nannet gelbbolašvuođa mánáid ja nuoraid gaskkas lea buorre vuohki eastadit sámevaši guhkit áiggi vuollái, ja dasa mii dárbbašit oahpaheddjiid geat dihtet mii sámevašši lea, dadjá Myrnes Balto.
Sámediggeráđđi áigu dás ovddas guvlui máŋgga suorggis vuoruhit hukset Sámedikki barggu mii guoská sámevaššái, earret eará mii guoská eastadeapmái ja meannudanvuogádagaide. Okta áŋgiruššansuorgi lea nannet iešguđet dásiid jođiheddjiid gelbbolašvuođa sámevaši birra, maiddái mánáidgárddis ja skuvllas.
