Vihtta sámi nissonfitnodatjođiheaddji designsuorggis, geat vuvdet miljovnnaid ovddas dán guovllus, leat dáid beivviid leamaš čoahkkanan Romsii. Ovttas Sámedikkiin leat sii ráhkkanan Oslo Design Fair searvamii mii lea boahtte jagi borgemánus.
Fitnodagat leat gieskat čađahan nuppi čoagganeami Romssas, gos sis leat leamaš čoahkkimat Davvi-Norgga Seastinbáŋkkuin, Møbelsnekkeriet Ekte fitnodagain ja pitch-áššedovdiin Andreas Nilseniin geat barget gründerhuben Flowas.
Sámi nissonolbmot fitnodatjođiheaddjin
Sámediggi lea álggahan fitnodatovddidanprográmma «Faamoe» (mii mearkkaša fápmu máttasámegillii) sámi designeriid várás. Vihtta nissonfitnodatjođiheaddji servet prográmmii, mas váldofokusis lea fitnodagaid gánnáhahttivuođa nannen.
– Innovašuvdna Norgga raporta nissonealáhushutkiid birra čájeha ahte nissonolbmuid gaskkas eai leat nu ollu ealáhushutkit go almmáiolbmuid gaskkas. Danne lea hui illudahtti oaidnit go mis, «Faamoe» prográmmas, leat nana ja čeahpes nissonfitnodatjođiheaddjit, dadjá sámediggeráđđi Silje Karine Muotka preassadieđáhusas.
Fitnodagat ovddastit ollu fágasurggiid, nu go gráfalaš design, stohpoortnet, illustrašuvdna ja čikŋadesign. Oasseváldit bohtet Graveniid fitnodagas Kárášjogas mat designejit ja buvttadit ullobiktasiid báikkálaččat, designer LilleLi smykker, stohpoortnetbuvttadeaddji Sámi Stories, Romssa illustratevra Kine Kunst ja designfitnodat Árvu.
Sámi identitehta ovdamunnin
Dál oaidnit ahte sámi identitehtas lea ovdamunni designa oktavuođas. «Faamoe» designfitnodagat leat mielde hábmemin sámi identitehta iežaset designa bokte ja sii hutket mohtaid ja treanddaid, mainna sii leat mielde nannemin olles sámi kultuvrra. Prográmmas lea fokus movt fitnodagat geavahit iežaset sámi identitehta ja oktasaš kultuvrra árjjalaččat mearkagálvvuset fállamis.
Dán jagi áigge áigot sii ovttasbargat searvamii Oslo Design Fair meassuide ulbmiliin ahte olámuddui buktit sámi designa ollu arenain olggobealde báikkálaš márkana dahje turistamárkana.
«Faamoe» nubbi čoagganeapmi
Čoagganeames skábmamánu 5. ja 6. beaivvi lei fokus vuovdinteknihkaide ja movt fysalaččat ordnet vuovdinbeavddi, mii lea ávkkálaš maiddái ovdal juovllaid, go galget ráhkkanit meassuide ja márkaniidda.
Fitnodagat dadjet máhcahandieđuin ahte lea buorre go lea «Faamoe» gos sii čohkkejit návccaid ollásit nannet iežaset fitnodaga ja mearkagálvvu, go sii beaivválaš doaimmas dábálaččat fokuserejit kundariidda ja buvttadeapmái.
– «Faamoe» lea álggahuvvon eará fitnodatovddidanprográmmaid evalueremiid maŋŋel ja čájeha juo buriid bohtosiid eanet individuála sisdoaluin mii manná unnit oasseváldiide, dadjá sámediggeráđđi Silje Karine Muotka vel preassadieđáhusas.
