Dán geasi beassá Kárášjogas geahččat dološ govaid maid Elisabeth Meyer lea govven.
Suoidnemánu 4. beaivvi rahppo ođđa dáiddačájáhus Sámi Dáiddaguovddážis Kárášjogas. Fylkkaráđđi Anne Toril Balto rahpá čájáhusa, ja juoigit Rávnná-Jovn`Rávdná, Ravna A. Guttorm ja Biret Ristin Sara galgaba guoimmuhit rahpamis.
Čájáhus lea Finnmárkku fylkkagirjerádjosa, Sámi Dáiddaguovddaža ja SVD Musea ja Kárášjoga historjásearvvi ovttasbargu.
Vajálduvvon Norgga govvahistorjjas
Okta dain čájáhusain mii almmuhuvvo lea Elisabeth Meyer: «Jođi lea buoret go oru».
Elisabeth Meyer (1899) lei govvideaddji ja juornalista, ja mátkkoštii olu báikkiin govvidit. Son lei earret eará Tyrkias ja Persias ovdal go bođii Finnmárkui 1937-1939. Sullii 1600 gova, maid Meyer lea govven Finnmárkkus, leat vurkejuvvon fylkagirjerádjosii, ja dáin leat sullii 600 gova govvejuvvon Kárášjogas ja Guovdageainnus.
Sámi dáiddaguovddáš muitala preassadieđáhusas ahte Elisabeth Meyer lea guhká leamaš vajálduvvon Norgga govvahistorjjás. Su govat leat 30 jagi orron muhtun garášas.
Dáiddačájáhus rahppo suoidnemánu 4. beaivvi dii. 18:00 ja bistá borgemánu 30. beaivái.
