Ráhkadit Davvi-Norgga buoremus iđitborramuša

Guovdageainnu Thon hoteallas lea rápmásat go leat nammaduvvon gilvui mas válljejit buoremus iđitborramušhoteallaid.

Leat iskan badjel 400 hotealla miehtá riikka, ja gáibádusat borramušaide leat kvalitehta vuođul, man ollu biebmu lea, man čábbát lea biebmu biddjon beavdái, dieđut ja bálvalus gussiide, áibmogeardi, ráidnen ja man čorgat lea.

Goahkka hui oidnosis

Restoráŋŋas lea goahkka gii ráhkada iešguđetlágan omeleahtaid ja olbmot besset válljet maid omelehttii seaguha. Sus diŋgojit juste guokte omeleahta go Ávvir fitná ságain.

– Lea ihána suohtas go mii ráhkadit nu buori biepmu dáppe ahte leat nammaduvvon guđa buoremusa searvái, lohká goahkka Tom Are Skum Edvardsen, gii lea sullii mánu bargan Thon hoteallas Guovdageainnus.

Duhtavaš guossit

Ollu guossit leat boradeame, ja čáhcesuolohasat Janne Lund ja Fred Magne Heikkilä leaba hui duhtavaččat biepmuin.

– Dát iđitborramuš lea nu buorre ahte idjadanhattiin oktii lea eanet go dušše veara, dadjaba oktiinjálmmiid. Soai leaba maid gullan ahte hoteallas lea hui buorre iđitborramuš, ja lohkaba suohtasin go goahkka lea nu buoremielas ja moddjái go ráhkada biepmuid.

Ihttáža rájes sáhttá hotealla leat áibbas gitta, bargoheaitta dihte mii odne viiddiduvvo go buot bargit šaddet searvat bargoheaitagii. De ii beasa oktage idjadit hoteallas, ii ge restoráŋŋa leat rabas ihttá rájes.

Čakčii almmuhit vuoiti

Lea Haugen-Gruppen mii lágida dán gilvvu man namma lea «Twinings Best Breakfast 2016».

Dán rádjái leat golbma Scandic-hotealla, guokte Nordic Choice Hotels ja okta Thon-hotealla viidáset árvvoštallamis. Riikavuoiti almmuhuvvo čakčat.

Dát guhtta hotealla leat mielde gilvvus:

Oarje-Agder: Scandic Kristiansand Bystranda

Nuorta-Agder: Clarion Hotel Tyholmen, Arendal

Telemárku: Quality Hotel Skjærgården, Langesund

Lulli-Trøndelága: Scandic Nidelven, Trondheim

Davvi-Trøndelága: Scandic Hell, Hell

Finnmárku: Thon Hotel Kautokeino