Nationála rámmaplána, Bieggafápmu, Bieggamillu, Ráđđehus, Kjell Børge Freiberg, John Anders Sara, Boazodoallu,
Ráđđehus gesii mannan duorastaga ruovttoluotta nationála rámmaplána bieggafámuid vuoruhanguovlluid huksemii. Norgga stuorámus orohaga jođiheaddji, John Anders Sara, lea duhtavaš go plánas ii šaddan mihkkege.
Rámmaplánas ledje guorahallan ja evttohan 13 guovllu Norggas gosa livččii heivvolaš bieggafámu hukset. Jurdda lei ahte dat plána galggai leahkit riidováidudeaddji doaibman, muhto nu ii šaddan. Ráđđehus oaččui nu ollu moaitámušaid suohkaniin gulaskuddamis ahte válljejedje geassit ruovttoluotta rámmaplána. Ráđđehus oaččui badjel 5000 cealkámuša áššis, ja eanas oassi lei kritihkalaš.
Eai bargga viidáseappot plánain
Oljo- ja energiijaministtar Kjell Børge Freiberg dieđiha preassadieđáhusas ahte ráđđehus ii bargga viidáseappot bieggafámu rámmaplánain.
– Go mii sáddiimet bieggafámu rámmaplána gulaskuddamii, de bivddiimet oaiviliid ja cealkámušaid álbmogis, ahte berre go ráhkaduvvot nationála rámmaplána. Bargu mii lea dahkkon dan oktavuođas ja cealkámušat mat leat boahtán leat addán midjiide buoret vuođđogelbbolašvuođa bieggafámuid ektui, earret eará konsešuvdnaproseassas, dadjá Freiberg.
Buorre go leat geassán ruovttoluotta
Kárášjoga oarjjábeale orohaga (D16) jođiheaddji John Anders Sara lea duhtavaš go ráđđehus lea geassán ruovttoluotta rámmaplána. Sin orohaga geasseorohat lei okta dain guovlluin mii lei mielde evttohuvvon rámmaplánas.
– Lea dieđusge issoras buorre go dan leat dahkan. Lea maid buorre go ráđđehus lea váldán vuhtii ja guldalan daid cealkámušaid mat leat boahtán. Livččii imaš ja ártet jus eai livčče bidjan eret daid plánaid go oaidná man olu moaitámušaid plána oaččui, go mii eat hálit makkárge dakkár sisabahkkemiid, dadjá Sara.
Son dadjá ahte bieggafápmofitnodagat leat geahččalan addit álbmogii dan gova ahte bieggafámut eai vahágahte luonddu, muhto lea čájehuvvon ahte nu han ii leat.
– Eai han dat leat veahášge ustitlaččat lundui go geahččá man olu eatnamiid dat geavahit daidda rusttegiidda. Guovlu gos bieggafápmorusttegat leat han giddejuvvojit buohkaide, dohko ii beasa oktage, dadjá Sara.
Stuora doarjja álbmogis
Sara muitala ahte eai leat dušše olbmot geat leat boazodoalu siskkobealde geat ipmirdit ahte bieggafámu sisabahkkemat eai leat buorit boazodollui, ja ahte Finnmárkkus obbalaččat ipmirdit ahte boazodoallu dárbbaša daid eatnamiid mat leat.
– Mun vuohtán álbmogis beaivválaččat ahte dán áigge lea eambbo ipmárdus boazodollui. Olbmot dihtet ja mii leat várra maid šaddan čeahpibun muitalit iežamet dili ja ealáhusa birra. Boazodoalloservvodat han lea okta oassi dain geat ealihit Finnmárkku. Dasa lassin ipmirdit olbmot maid ahte luondu mii lea ain báhcán ferte ráfis leahkit, dadjá Sara.
Eai sáhte vuoiŋŋastit gal
John Anders Sara dadjá ahte vaikko dán rámmaplánas ii šaddan dán vuoru mihkkege, de ii leat daddjon ahte doppe eai boađe bieggafápmofitnodagat mat goitge bahkkejit sin eatnamiidda.
– Ii mis goitge noga bargu daid vuostá rahčat. Dat fitnodagat mat áigot bieggamilluid cegget eai noga goassege. Dál lea dušše plána ,man ráđđehus lei evttohan, biddjojuvvon eret, muhto fitnodagain, main leat plánat, eai gal várra noga, dadjá son.
– Mis eai leat hálbbes eatnamat gostege, buot eatnamat min orohagas leat liikká divrasat ja daidda lea liikká stuora dárbu, loahpaha Sara.
