− Ráđđehusa mielas lea mávssolaš ovddidit digitála almmolaš suorggi olles álbmogii. Dan oktavuođas lea mávssolaš ahte maiddái sámi geavaheaddjit gávdnet digitála čovdosiid iežaset gielaide, dadjá guovllu- ja digitaliserenministtar Linda Hofstad Helleland.
Odne ovddiduvvo dieđáhus, man fáddá lea digitaliseren. Stuorradiggedieđáhusas ráđđehus čujuha vejolašvuođaide, maid digitaliseren buktá sámi geavaheddjiide. Ráđđehus háliida maid čalmmustahttit buriid digitála doaimmaid, mat leat jo álggahuvvon sámegielaide. Dan čállá ráđđehus iažaset neahttasiiddus bearjadaga.
Áŋgiruššet eanet sámegiela digitaliserema ovdii
– Ráđđehus lea maŋimuš jagiid álggahan ollu doaimmaid, maiguin nannejit sámegiela digitaliserema. Mii leat várren 15 miljovnna kruvnno sámi digitála oahpponeavvuide, ja mii bargat ođđa álbmotregistariin, mii doarju buot sámi bustávaid. Mii leat maid nannen Nationálagirjeráju digitaliserennávccaid, mii dahká vejolažžan digitaliseret sámi museaid ja Sámi arkiivva materiálaid, muitala Helleland.
Maŋimuš jagiid leat maid bidjan eanet návccaid Romssa universiteahta giellateknologiijabirrasii – masa gullet Divvun ja Giellatekno – ja gos ráhkadit prográmmaid, maiguin šaddá álkibun geavahit sámegiela digitála vuogádagain.
Stuorradiggedieđáhusas ráđđehus árvala rievdadit sámi áviissaid doarjaga nu, ahte ii leat čadnon almmustahttinvuogádahkii, vai dan láhkai movttiidahttet innovašuvdnii ja dieđuid beaktilut juohkimii.
Hástalusat ain
Stuorradiggedieđáhusas muitalit hástalusaid birra, mat čatnasit digitála bálvalusaid fállamii sámiide, ja čuolmmain maid sámegielaid geavaheaddjit vásihit digitála árgabeaivvisteaset. Stuorra hástalussan leat riikkaidgaskasaš teknologiijafitnodagat, nu mo Apple ja Microsoft, mat eai atte vejolašvuođa geavahit prográmmaid unnitlogugielaide. Dan geažil sámegiel geavaheddjiide lea váddásut oažžut dihtorii ja mobiilatelefovdnii prográmmaid iežaset gillii.
– Moai sámediggepresideanttain gulahalle dál máŋggain fitnodagain, mo dahkat álkibun geavahit prográmmaid sámegillii. Teknologiija lea, dan ferte dušše oažžut álkibut olámuddui, dadjá Helleland preassadieđáhusas.
