Positiiva lohkkiidlogu ovdáneapmi Ávviris joatkašuvvá

Dan 227 aviissas mat dáin loguin leat mielde, lassána lohkkiidlohku 166 aviissas. Ávvir lea daid aviissaid gaskkas main lohkkiidlohku lassána. 

Duorastatiđit almmuhii Mediebedriftens Landsforening riikka aviissaid deaddilanloguid ja lohkkiidloguid. 

Das leat buorit ođđasat Ávvirii, muhto eai riekta nu buorit dan dárogiel sámi aviisii, Ságat.

Nanu deaddilanlogut

Logut čájehit ahte eanas mediaásahusain Finnmárkkus lea positiiva ovdáneapmi.

Finnmark Dagbladas (+217), Finnmarkenis (+145) ja Finnmarkspostenis (+147) Amedias leat nanu deaddilanlogut dan maŋemus jahkebeali. Altaposten (+5) lea maid rievttes bealde, muhto ii riekta nu nanu loguin.

Ságat (-15) gal manná fas garrasit ruovttoluotta.

Positiiva ovdáneapmi

Dan 227 aviissas mat dáin loguin leat mielde, lassána lohkkiidlohku 166 aviissas. Ávvir lea daid aviissaid gaskkas mas lohkkiidlohku lassána. 

Ávvira váldodoaimmaheaddji Kari Lisbeth Hermansen lea ilus go positiiva lohkkiidlogu ovdáneapmi Ávviris joatkašuvvá.

Vuosttaš jahkebeali diibmá lassánii lohkkiidlohku 96 lohkkiin. Nuppi jahkebeali, daid loguid mielde mat dál almmuhuvvojedje, de lea Ávviris lassánan ain lohkkiidlohku 27 lohkkiin.

Ávvir massii lohkkiid 2015:s ja 2016:s.

– Geassemánu 2017 almmuheimmet Ávvir+ ja dan jáhkkit ge duođai min veahkehan jorgalahttit 2015 ja 2016 negatiivaloguid plussalohkun, ja dat dáidá maid čilgehussan dasa go lohkkiidlohku dássedit fas lassána.

Digitálaviissa lohkkit lassánit

Ávvir vásiha dan seamma maid olu earát aviissat, namalassii ahte báberaviissa lohkkiidlohku njiedjá, muhto digitálaaviissa diŋgojeaddjit fas lassánit. 

Váldodoaimmaheaddji jáhkká ge dan go leat buoridan Ávvira digitála fálaldagaid, mii lea addán buriid bohtosiid. 

Giitá lohkkiid

– Mii Ávviris háliidit giitit aviissa diŋgojeddjiid, go juste sin dihte sáhttit mii ráhkadit buriid ja máŋggabealat áššiid Sámis. Dieđusge ferten rámidit min bargiid, geaid gudni lea go nagodit buvttadit áššiid maiguin doalahit iežamet lohkkiid ja maiddái geasuhit ođđa lohkkiid, lohká Hermansen vel.

Eai leat áibbas duhtavaččat

Ságat lea okta dan golmma aviissas Finnmárkkus main logut leat minusa bealde. 

– Mii eat leat áibbas duhtavaččat go njiejaimet 15 aviissain vuosttaš jahkebeali diibmá. Muhto jus buohtastahttit 2017:in, de mis gal lea buorre ágga leat duhtavažžan. 2017 ektui mii leat lassánan 73 aviissain, nu ahte dainna mii leat duhtavaččat. Mis lei vuosttaš jahkebeali lassáneapmi 88 aviissain, muhto de massiimet 15 dan 88 ođđa lohkkis maid leimmet ožžon vuosttaš jahkebeali, čilge Ságat aviissa váldodoaimmaheaddji, Geir Wulff.

– Eat leat vuoittáhallan

2018 lea vuosttaš jahki Ságat aviissa historjjás go manne meaddel 3000 deaddileami, mii guhká lea leamaš mihttu. Dat lei stuora dáhpáhus sidjiide, stuora dáhpáhus go viimmat nagodedje dan.

– Mis ii leat vuoittáhallandovdu vaikko ledje negatiiva logut. 2018 lea leamaš dehálaš jahki Ságat aviisii, go lassáneimmet 78 deaddilemiin ja manaimet dan magihkalaš rájá meaddel, 3000, dadjá Wulff.

Vaikko 2018 lei buorre jahki, de čájehit deaddilanlogut negatiiva loguid, maid fertejit buoridit.

– Mii geahččalit čađat ráhkadit buoret aviissa, ja geahččalit márkanfievrridit dan iešguđet ládje. Mii sávvat ahte nagodit dál vuosttaš jahkebeali oažžut ruovttoluotta dan 15 maid leat massán.

Illudit go earát lihkostuvvet

– Lea álo hávski go eará aviissat lihkostuvvet, ja erenoamážit buorre go Ávviris lea mearkkašahtti ovdáneapmi aviisasturrodaga ektui. Dainna illudit singuin fárrolaga, dadjá Geir Wulff vel loahpas.

Finnmárkku aviissaid logut