Boazopolitiijat ohcalit vihtaniid geat leat oaidnán guokte dievddu guđa- dahje njealjejuvllagiin gaskavahku Navkajávrriid guovllus, Rávttošvuomis Porsáŋggus.
Finnmárkku politiijaguovllu politiijabálvá ja Boazopolitiija jođiheaddji Inger Anita Øvregård sáddii preassadieđáhusa mannan bearjadaga ahte politiijat ohcet vihtaniid lobihis ealgabivdui Rávttošvuomis Porsáŋggu gielddas.
– Eat mii leat ožžon makkárge cavgilemiid mannan vahkuloahpas. Dan mun dárkkistin sotnabeaivvi eahkedis, lohká politiijabálvá ja Boazopolitiija jođiheaddji Inger Anita Øvregård.
Vuorkágovva: Inger Marie Guttorm
Lobihis ealgabivdu
Mannan bearjadaga muitalii politiijabálvá Øvregård ahte sii dárbbašit veahki olbmuin jus ležžet oaidnán guoktása njealje- ja guđajuvllat sihkkeliiguin vuodjimin mannan gaskavahku maŋŋelgaskabeaivvi dahje eahkedis Návkajávrris Rávttošnjárgii.
– Sudnos lei stuorra guorbmi gárrojuvvon sihkkeliidda, mii sáhttá leat njuvvon ealga. Dat mii sáhttá leat njuvvon ealga lei gokčojuvvon guđjjuin dahje plastihkkaseahkaiguin, čilge politiijabálvá ja boazopolitiija jođiheaddji Inger Anita Øvregård.
Son lohká sii leat áibbas sihkkarat dat lea ealga, iige boazu.
– Dán ášši lea muhtin olmmoš oaidnán. Danin leat sihkkarat ahte lea sáhka lobihis ealgabivddus, ii ge bohccos, lohká Øvregård.
Ávžžuha cavgilit
Politiijat navdet ahte dat guoktá leaba fárrolaga dahje goabbá ge vuoru vuodján meahccemáđii mielde Návkajávrris Rávttošnjárgii, ja dolvon njuvvon ealgga biilla lusa ja das de viidáset.
– Jus oktage lea oaidnán maidege mii soaitá gullat dan áššái, de ávžžuhat mii du cavgilit politiijaide telefunnummarii 02800 dahje 78972000, čállá Finnmárkku politiijaguovlu preassadieđáhusas.
