Mannan ija ledje nu unnán dáhpáhusat ahte politiijat leat bállen eará diŋggaid maid bargat go bahádahkkiid oaguhit.
Mannan ija ledje nu unnán dáhpáhusat ahte politiijat leat bállen eará diŋggaid maid bargat go bahádahkkiid oaguhit.
Maŋemus 12 diimmus lea hui unnán dáhpáhuvvan Finnmárkkus, ahte politiijat leat juo bállen eará diŋggaid bargat go bahádahkkiiguin garadit.
– Juo, lea unnán bargu leamaš, ja dat lea min mielas maid hui buorre, muitala Finnmárkku politiijaguovllu operašuvdnajođiheaddji, Ann Rigmor Søderholm Ávvirii.
Lehpet bállen julggiid dušše cekkohallat ja gáfe jugadit?
– In dieđe jur cekkohallat gal, muhto juo, de bálle ovdamearkka dihte fágagirjjiid lohkat ja oahppat maid juoidá go ii mihkke dáhpáhuva. Ja buorre lea dat, lohká son, ja ii ge loga šat nu olu eará muitalit go ahte Girkonjárggas álggii borgat.
Dá leat dat dáhpáhusat:
Bearjadat
Diibmu 22.32:
Girkonjárggas gárrendiŋga čievččai biillaid. Politiijat cogge su giddagassii čielgat.
Lávvordat
Diibmu 01.30:
Gilevuonas dohppejedje njealjátlot-jahkásaš dievddu gitta, go várohit son vujii gárrenoaivvis. Varraiskosiid válde ja vuoddjikoartta duoguštedje.
02.35:
Beare garrasit čuojahedje musihka ovtta viesus Bossugobis Álttás. Politiijat heaittihedje feasta.
03.07:
Guovdageainnus lei biilavuoddji ribahan biilla eret luottas. Ii okta ge roasmmohuvvan. Biilavuoddji, viđátlot-jahkásaš dievdu, orui gárremin, ja politiijat dolvo su válddiheame varraiskosiid.
03.11:
Girkonjárggas gárren nisu mannan garašii ovtta viesu olggobeale, iige gáro mannat. Politiijat dolvo su ruoktot.
03.35:
Gárrendiŋggat suhtadan ovtta dain Álttá hoteallain, ášši čovdui das juo.
04.43:
Viessu buollán Tollevikas Álttás. Ii okta ge roasmmohuvvan, ja buollinčáskadeaddjit jáddadedje dola. Ášši galgá dutkojuvvot politiijaid bealis.
07.49:
Gáŋgaviikkas várohit viđátlotjáhkásaš dievddu gárrenoaivvis vuoddján. Sus leat varraiskosiid váldán.
