Álttás lágiduvvo Høstsprell festivála dán vahkkoloahpa ja politiijain gárttai olu bargu miehtá gávpoga.
Finnmárkku politiijat dieđihit Twitter bokte sullii diibmu 16 áiggi ahte Kronstadas, Álttás, lei johtolatlihkohisvuohta. Doppe ledje golbma biilla oktiibeaškkihan, muhto eai lean stuorra materiálalaš vahágat, eaige lean olbmot roasmmehuvvan. Ii mannan guhkes áigi ovdal go johtolat sáhtii fas dábálaččat johtit lihkohisvuođabáikki meaddel.
Diibmu 21:27 bođii ges diehtu politiijain ahte Joganjálmmis, Álttás, lei 30-jahkásaš dievdu leamaš veahkaválddálaš muhtin rámbuvrras. Dat dáhpáhuvai go rámbuvrabargi fuobmái ahte dievdu lei viggan suoládit gálvvuid rámbuvrras. Dievdu lei gárrendilis ja politiijat ožžo dievddu gitta. Son lea oahpis politiijain ovdalaččas ja biddjui giddagassii.
Diibmu 01:39 ožžo politiijat dieđu ahte sullii 25 moped- ja UTV-vuoddji vuojašit vázzingeainnuin Joganjálmmi skuvlla ja Shell-stašuvnna guovllus, Álttás. Mopeda- ja UTV-vuoddjit rikkerejedje mohtoriiguin ja gilvaledje.
Diibmu 01:46 fitne Álttá politiijat fas muhtin feasttas Industrihøydenis Álttás. Lei leamaš olu riedja. Viessoeaiggát oaččui gohččuma jaskkodit gitta diibmu gávcci rádjái.
Diibmu 01:52 lei muhtin 20-jahkásaš dievdu rikkeren Høstsprell festiválas mii lágiduvvo dán vahkkoloahpa Šuovusluovttas, Álttás. Son biehttalii jeagadit politiijaid gohččuma ja biddjui gárrengiddagassii.
– Son lei rikkeren doppeiige čuvvon politiijaid gohččuma vuolgit báikkis. Dasto biddjui gárrengiddagassii, dadjá Leo Johansen politiijaid operašuvdnaguovddážis.
Diibmu 2 fitne politiijat fas eará feasttas ja bivde feastalágideaddji jaskkodit. Ledje ránnját geat váide.
