Politiijat leat gaskaboddosaččat vearjuduvvon olles riikkas gaskavahkku njukčamánu 27. beaivvi rájes gitta maŋŋebárgga cuoŋománu 2. beaivvi rádjái ođasmahttojuvvon áittaárvvoštallama geažil.
Duogáš lea go Politiija sihkarvuođabálvalus (PST) čilge ahte girkut ja kristtalaš čoahkkananbáikkit leat áigeguovdilis terrorulbmilat beassážiid áigge, čállá Politiijadirektoráhtta preassadieđáhusas.
– Politiijaid deháleamos bargu lea sihkkarastit álbmoga. Vaikko eai leatge konkrehta áitagat, de lea politidirektevra ollislaš árvvoštallama vuođul mearridan bidjat gaskaboddosaš vearjudeami vai sihkkarastit buoremus vejolaš gearggusvuođa beassážiid čađa, dadjá Politiijadirektoráhta gearggusvuođadirektevra Tone Vangen.
Norgga áittadássi ii leat ollislaččat rievdan, ja politiijat ávžžuhit álbmoga ávvudit beassážiid nu go dábálaččat vaikko politiijat soitet leat eanet oidnosis ja politiijain leat vearjjut.
