Ođđa speallu Pokemon GO almmuhuvvui Norggas lávvordaga. Dát speallu lea hirbmat bivnnut šaddan moatti beaivvis ja leat juo oallugat Guovdageainnus geat leat fuobmán dán spealu. Okta dain lea 19-jahkášaš Guovdageainbárdni Ole Dánel Eira.
Ođđa speallu Pokemon GO almmuhuvvui Norggas lávvordaga. Dát speallu lea hirbmat bivnnut šaddan moatti beaivvis ja leat juo oallugat Guovdageainnus geat leat fuobmán dán spealu. Okta dain lea 19-jahkášaš Guovdageainbárdni Ole Dánel Eira.
Son muitala ahte dáinna spealuin sáhttá miehtá márkana ohcat pokemonaid.
– Dáppe leat poasttat gos oažžu diŋggaid nugo ovdamearkka dihte poke-spáppaid ja eará diŋggaid maid sáhttá atnit go galgá fáŋget pokemonaid, muitala Eira.
Eira muitala ahte pokemonaid ges gávdná eará báikkiin, spealus lea juoga mainna oaidná go pokemonat leat lahkosis, ja oaidná maiddái makkár pokemonat dat leat.
– Ferte vázzit ja geahččat mátketelefovnna šerbmii, dassážii pokemona iđista, muitala son.
Ulbmil spealuin
Spealus leat nu gohčoduvvon «gymat» gosa sáhttá iežas gievrramus pokemona bidjat, ja de galget eará speallit geahččalit dan časkit.
– Mii gilvalat gii oažžu «gyma» ja dan galgá doalahit «gyma» nu guhká go sáhttá, dadjá Eira. Son muitala spealus leat golbma joavkku, rukses, alit ja fiskes, ja lohká ahte dat lea dego spábbačiekčamis, joavkkut nugo Manchester United, Liverpool ja nu ain.
Ollu speallit
– Leat álgán eanet ahte eanet olbmot Guovdageainnus speallat spealu, dadjá Eira.
Son muitala ahte Guovdageainnus leat ollu iešguđet lágan joavkkut.
– Nugo ovdamearkka dihte mun ja mu olbmát speallat ovtta joavkkus, ja mii dieđusge háliidit doalahit min «gymaid», muitala Eira., ja lasiha vel:
– Juste dál leat «gymat» su joavkku hálddus, ja leat earát geat geahččalit doarrut sin vuostá ja sis rivvet daid «gymaid».
Ovttastallat olbmáiguin
Eira muitala ahte su mielas lea somá speallat spealu go de beassá olbmáiguin ovttastallat ja fárrolagaid ohcat pokemonaid, ja lohká iežas speallat dušše dan dihte go su olbmát spellet.
– Mii lávet vuodjit biillain ja ohcat daid, dat šaddá veahá álkit, go Guovdageainnus leat nu guhkes gaskat, dadjá Eira. Son muitala ahte lea ovddit vahku jo álgán, vaikko ii Norggas almmuhuvvon ovdal mannan lávvordaga.
– Mun vižžen Amerihkká veršuvnna vai bessen árabut álgit speallat spealu.
Govven: Nils Johan Vars (vuorkágovva)
Jierpmálaččat ohcat pokemonaid
Politiijat eará sajiin Norggas leat ožžon dieđuid ahte olbmot geat spellet Pokemon GO, vudjet summal. Sii leat maid šaddan nuoraid viežžat buohcciviesu dáhki alde, go leat doppe leamaš ohcame pokemonaid.
Guovdageainnu leansmánni Klemet Klemetsen muitala ahte eai leat ožžon Guovdageainnus makkárge dieđuid ahte nuorat leat mannan dakkár báikkiide gosa eai galgga ja heive.
Jierpmálaš ohcan
– Mun jáhkán ahte nugo dáčča lohká «sunt bondevett» lea lohpi atnit dán oktavuođas, dadjá Klemetsen. Son dadjá ahte jierpmálaš ohcan ii daga gal maide.
– Galgá jierpmi maid atnit, it don mana priváhta guovlluide ja doppe oza daid. Dat sáhttá šaddat boastut, dadjá leansmánni Klemetsen.
