Suodjalusa CV90 nammasaš «panservovdna» lea mannan jieŋačađa Leaktojávrris. Buohkat beassan gáddái.
Otne, bearjadaga diibmu 11.00- áigge, sullii beannot miilla Áisaroaivvi nuortta lulábeale lea Suodjalusa panservovdna mannan jieŋačađa. Panservovnnas ledje njeallje olbmo geat buohkat besse gáddái.
Jávregáttis
Dieđut maid Ávvir lea ožžon, lea ahte panservovdna lea hui lahka gátti, ii eambbo 10-15 mehtera gáttis eret. Juste dakko ii galgga leat nu čieŋal, nu ahte dat ii leat oalát čázi vuolde.
Panservovnnas ledje njeallje profeššunealla soalddáha gullevaččat Telemark bataljuvdnii.
– Min dieđuid mielde ii galgga jiekŋa leat heittot dan jávrris, ja danin leat maid tanksat vuodján dakko, muitala preassaoffiseara, Major Bryjar Stordal Ávvirii.
Son duođašta ahte sii bidjet johtui guorahallama manin panservovdna manai čađa jieŋa juste dakko.
Govven: forsvaret.no
Goikadallame barttas
Ávvira dieđuid mielde galget leamašan golbma ovttalágan panservovnna jođus. Okta dain manai jieŋa čađa.
Panservovdna, man birra lea sáhka, leat dakkár smávit panservovdna maiguin fievrridit soalddáhiid maid, dasa lassin go sii geat vudjet pansevovnnain.
Panservovdna lea nu gohčoduvvon «stormpanservovdna» ja fievrridit soalddáhiid. Soalddáhat dan panservovnnas galget buohkat beassan gáddái, ja Ávvira dieđuid mielde leat sii beassan liekkadit ja goikadallat smávit barttas mii lea das leaktojávregáttis.
– Mii eat atte dieđuid man galle panservovnna ledje fárrolaga. Sáhtán dušše lohkat ahte ledje njeallje soalddáha dan vovnnas mii manai čađa jieŋa, ja sii leat dearvan . Dat lea maid midjiide buot deháleamos dál juste.
Gádjume
Báikái leat dál jođus stuorit panservovnnat mat galget gádjut dan mii jieŋačađa lea mannan.
Panservovnnat ledje hárjehallame «Joint Viking» suodjalus hárjehallan oktavuođas mii dál lea Finnmárkkus. Hárjehallan bistá njukčamánu 15. beaivvi rádjái.
Hárjehallamis leat 8000 soalddáha mielde, earret eará soalddáhat Amerihkás ja Stuorra Británnias.
