Finnmárkku fylkkalávdegoddi lea ovttajienalaččat juolludan 340 000 ruvnno dán jagi ovddas Sápmi ealáhusgárddi doibmii.
Finnmárkku fylkkalávdegoddi lea ovttajienalaččat juolludan 340 000 ruvnno dán jagi ovddas Sápmi ealáhusgárddi doibmii.
Sápmi ealáhusgárdi ásahuvvui go Indre Finnmark Utviklingsselskap (IFU AS) rievdadii nama ja ossosiid Sápmi ealáhusgárdin. Váldokantuvra galgá Deanus gos IFU AS váldokantuvra lea dál. Sápmi ealáhusgárdi ásahuvvui guovvamánu 1. beaivvi 2016, ja 16 fitnodaga leat čállán ossosiid.
Kantuvrrat sis-Finnmárkkus
Váldokantuvra galgá doaibmat sihke Deanus ja Unjárggas, ja Unjárggas galget sierra kánturbeaivvit. Kánturdoaimmat galget maid leat Kárášjoga ja Porsáŋggu gielddain.
Sápmi ealáhusgárdi galgá veahkehit fitnodagaid sámi váldoguovlluin. Ealáhusovddasteaddjit Unjárggas, Kárášjogas, Deanus, Guovdageainnus ja Porsáŋggus galget mielde ealáhusgárddis.
Fylkkasátnejođiheaddjis buorre jáhkku
– Lea bures bargojuvvon Sápmi ealáhusgárddi ásaheami proseassas, ja mii leat ilus go álggaheaddjit leat lihkostuvvan ásahit fitnodathámi man fylkkagielda sáhttá ruđalaččat doarjut, dadjá fylkkasátnejođiheaddji Runar Sjåstad.
– Sis-Finnmárku dárbbaša gievrras mutuvrra mii nanne ealáhusovdáneami sámi guovlluin, ja mis lea buorre jáhkku ahte easka ásahuvvon Sápmi ealusgárdi šaddá dehálaš oassin ealáhusa ovdánahttimis váldoguovlluin, dadjá Sjåstad preassadieđáhusas.
