Guovdageaidnulaš Ken Are Bongo ja áltálaš Kristin Nicolaysen leaba goabbánai ožžon Finnmárkku fylkkasuohkana jagi 2017-18 filbmabargiid stipeandda.
Guovdageaidnulaš Ken Are Bongo ja áltálaš Kristin Nicolaysen leaba goabbánai ožžon Finnmárkku fylkkasuohkana jagi 2017-18 filbmabargiid stipeandda.
Ken Are Bongo gearggai iežas oahpuin Nordlándda dáidda ja filbmafágaskuvllas 2006:s ja lea dan maŋŋil leamaš mielde máŋga filbma- ja TV-prošeavttain. Son lea 2010 rájes bargan ollesáigge filbmabargin Finnmárkkus ja lea earret eará leamaš mielde buvttadeamen nugo «Hjerterått», «Kill Buljo2» ja «Kautokeinoopprøret». Dasa lassin lea vel bargan iežas filbmaprošeavttaiguin.
Ekonomalaččat mearkkaša ollu
Bongo lohká stipeanda mearkkaša hui ollu sutnje.
– Oh, dat mearkkaša nu ollu. Dat ráddje munnje ekonomalaččat saji bargat prošeavttaiguin, maidda mus lea miella bargat. Nu movt dál lea dilli, de ferten váldit ollu oanehisáigge filbmenbargguid, nu movt NRK ja SVT ovddas, njulgestaga vai oaččun bálkká, lohká son.
Bidjá vuođu boahtte áigái
Bongo muitala sus leat alddis jođus máŋga stuorebuš filbmaprošeavtta, maiguin lea máŋga jagi juo bargan, muhto lea bisánan ekonomiija dihte.
– In hálit vuos muitalit makkár prošeavttat dat leat, muhto sáhtán lohkat ahte dat galget bidjat vuođu mu fitnodaga dienassisabohtui boahtte áiggis. Bohtosat dáin prošeavttain rehkenasten leat gárvás birrasiid guovtti jagi geahčen, muitala son.
Stipeanda bures boahtin
Bongo mieđiha ahte leahkit filbmabargin Finnmárkkus ii leat dat álkimus maid sáhttá bargat.
– Lea ollu rahčamuš ja leat ollu lossa áiggit ekonomalaččat, muhto lean goit 2010 rájes nagodan ollesáiggi bargat filbmabargin. Danne lea dát stipeanda hui bures boahtin, lohká Ken Are Bongo.
Dokumentárafilbmabargi
Nuppi stipeandda oaččui ges Kristin Nicolaysen, gii eanaš bargá dokumentárafilmmaiguin, muhto sus lea maid hárjáneapmi reklámafilmmain, dáiddafilmmain ja musihkkavideoin. Sus lea váldofága visuála kulturoahpus Romssa Universitehtas ja lea leamaš mielde iešguđet filbmabuvttademiin iešguđetlágan surggiin. Nicolaysena maŋemus dokumentára «En sang for Mursal», čájehuvvo NRK Super kanálas 2017 giđa.
(ášši joatká gova vuolábealde)
Stipeandda guovtti jahkái
Finnmárkku fylkkasuohkan juohká juohke nuppi jagi guokte 75.000 ruvdnosaš filbmabargiidstipeandda. Filbmabargit geat ožžot stipeandda fertejit orrut ja bargat Finnmárkkus. Olles stipeanda lea 150.000 ruvnnu ja juhkko guovtti jahkái. Boahtte juolludeapmi lohkko 2019-20.
Finnmárkku fylkkasuohkana kultur- ja johtolat váldolávdegoddi dat mearridii juolludemiid čoahkkimis juovlamánu 1. beaivvi.
