Duorastaga gielddastivrračoahkkimis buvttii Guovddášbellodat liigeevttohusaid johtolatsihkarvuođaplánii, earet eará ráhkadit vázzingeainnu Báhkiljohkii ja Ájonjárgii ja oaččui doarjaga dasa.
Guovddášbellodat buvttii liigeevttohusaid áššái mii guoskkai johtolatsihkarvuođaplánii.
Sii evttohedje busselupmaid ráhkaduvvot Strandmo nammasaš báikái ja Mánnevárnjárgii, dasa lassin cegget geaidnočuovggaid bisánansajiide.
Ožžo doarjaga
Dasa lassin evttohedje ráhkaduvvot vázzingeainnu suomaguvlui, Riidonjárgii ja Ájonjárgii, Deanu guvlui Niitonjárgga geaidnoerrui ja maiddái Báhkiljohkii.
Dán guovtti evttohusa doarjjui gielddastivra.
Muhto goalmmát evttohus, mii lei cegget geaidnočuovggaid dáid gaskkaide, ii ožžon doarjaga.
Duhtavaččat
Guovddášbellodat lei goittot duhtavaš ahte oaččui doarjaga prošeavttaide, maidda ferte ohcat doarjaga čađaheapmái earet eará fylkkagielddas.
– Lei hui buorre go oaččuimet čađa evttohusa busselubmaide ja vázzingeainnuide. Ii leat dušše dohko Vajamohkkenjárgii, muhto maiddái suoma ja Deanu guvlui. Geaidnočuovggaid ráhkadan evttohus ii mannan čađa, eaige sii gusto doarjjo ahte boaittobeale orrunsajiin lea seamma oadjebas ja čuovggat, nu go márkan orrunsajiin, dajai Guovddášbellodaga gielddastivrraáirras Anne Toril E. Balto maŋŋel čoahkkima.
