-Almmuhus-
-Almmuhus-
OĐĐASAT Ovddeš vuoiti láide sihkkel­gilvvuid viidáset

Ovddeš vuoiti láide sihkkel­gilvvuid viidáset

-

-

Offroad Finnmark lea virgádan ođđa beaivválaš jođiheaddji.

Maŋŋel dán jagáš Offroad Finnmark sihkkelgilvvu dieđihuvvui ahte Anders Abrahamsen luohpá beaivválaš jođiheaddjin. Dál leat virgádan Kjetil Johansena ođđa jođiheaddjin, dieđiha Offroad Finnmark preassadieđáhusas.

– Mii diđiimet ovdalaččas gii Kjetil lea. Sus lea viiddis hárjáneapmi ja sus leat ollu kvalitehtat maid mii háliideimmet. Go mii dál galgat ovddidit gilvvu vel ovtta lávkki viidáset, de lea Kjetil Johansenis juste dat gelbbolašvuohta ja beroštupmi maid mii ozaimet, dadjá stivrajođiheaddji Tor Arne Bellika preassadieđáhusas.

Illuda

Johansen lea logi jagi gilvalan sihkkeliin, ja lea ovdal oassálastán Offroad Finnmark -gilvvus, ja vuittii gilvvu 2010:s. Son lea ovdal leamaš mielde hukset bajás «Stoltzekleiven opp» mii dál lea máilmmi ceaggumuš ja Norgga stuorámus vuosteluohkkáviehkan. Son lea eret Bergenis, muhto lea orron Čáhcesullos maŋemus 20 jagi.

– Mun hervvošan maid Offroad Finnmark lea olahan álggu rájes. Lea sakka ollu maid gilvu sáhttá fállat. Das lea sáhka rasttildeames rájiid, luođuvásáhusain, čanastagain ja máhtus maid ii sáhte ruđain oastit, muitala Johansen. Son oaidná ollu vejolašvuođaid ovddidit gilvvu, ja čájeha vuollegašvuođa go lea ožžon hástalusa, preassadieđáhusa dieđuid mielde.

-Almmuhus-