Politiijat leat viššalit doallan leahttodárkkistemiid Finnmárkkus maŋemus beivviid. Disdateahkeda sáhkkohalle 19 olbmo iešguđet báikkis Finnmárkkus.
Disdateahket čužžo politiijat luoddaguorain Finnmárkkus ja dárkkistedje leahtu. Máŋggas sáhkkohalle go vudje lobálaš leahtoráji badjel.
Guovdageaidnu
Politiijat čužžo guokte diimmu ja dárkkistedje leahtu, ja ovcci olbmo sáhkkohalle. Alimus leahttu maid politiijat mihtidedje lei 65 km/d báikkis gos lea 50 km/d leahttorádji.
Deatnu
Deanus, Máskejogas, ledje maid politiijat dárkkisteame leahtu. Golmmas sáhkkohalle, ja alimus leahttu mii mihtiduvvui lei 102 km/d báikkis gos lea 80 km/d leahttorádji.
Ráhkerávju
Fálesnuori suohkanis, Ráhkerávjjus, sáhkkohalle čieža olbmo, dasa lassin duoguštedje ovtta vuodjinkoartta. Alimus leahttu lei 91 km/d, báikkis go lea 60 km/d leahttorádji.
