Čakčat álggahii Blå Kors chattenlinjja mii lea mánáid ja nuoraid várás geat hárddáhallet beaivválaččat Norggas.
Čakčat álggahii Blå Kors chattenlinjja mii lea mánáid ja nuoraid várás geat hárddáhallet beaivválaččat Norggas.
Chattenlinjjas, mii lea snakkommobbing.no siiddus, besset mánát ja nuorat ságastallat oadjebas rávisolbmuiguin geain lea fágalaš máhttu, ja ii almmuhuvvo gostege ahte leat váldán singuin oktavuođa.
– Mis leat logut mat čájehit ahte 60 000 máná vásihit hárdima juohke mánu. Sullii bealli sis doalahit iehčanassii daid váttisvuođaid maid vásihit, dahje sii leat geahččalan muitalit dan birra, muhto earát eai leat váldán dan duođalaččat, muitala neahttasiiddu jođiheaddji, Andreas Eidem.
Áigot doarjut sin geaid vásihit hárdima
– Muhtimat háliidit ahte mii galgat buktit sidjiide čovdosiid, muhto mii leat ságastallit geat veahkehit gávdnat makkár geainnu galget čuovvut. Min mihttu lea veahkehit sin geain lea lossa dilli hárdimiid dihte. Mii guldalit sin ja lea dehálaš ahte sii ieža dovdet ahte mii váldit sin vásáhusa duođalažžan, muitala Eidem.
Ollugat váldet oktavuođa
Leat ollugat geat váldet oktavuođa chattenlinjja bokte, ja leat eanaš nieiddat geat váldet oktavuođa. Eidem sávvá ahte eanet bártnážat maid váldet singuin oktavuođa. Eai leat dušše sii geat hárddáhallet geat čállet midjiide, muhto maiddái sii geat hárdet, muitala Eidem.
– Sis sáhttá maid heajos oamedovdu, ja sis lea muhtumin váttis dilli eallimis ja stuora hástalusat, vaikko ii sáhte dainnalágiin doarjut sin hárdima, muitala Eidem. Fálaldat lea buohkaide geat leat gaskal 9- ja 19-jahkásaččat.
– Buohkat sáhttet váldit oktavuođa, vaikko leat vel eahpádusas, muitala Andreas Eidem.
