-Almmuhus-
OĐĐASATOllugat váldet dálkasiid – ja vudjet biillain

Ollugat váldet dálkasiid – ja vudjet biillain

Journalista

-

-

Máŋga čuođi duhát olbmo borret dálkasiid mat leat várálaččat johtolahkii.

Gárrendilli lea stuora sivvan juohke njealját jápminlihkohisvuođas johtolagas. Dálkkasregisttar čájeha ahte badjel 800 000 olbmo gaskkal 20 ja 79 jagi ožžo diibmá unnimusat ovtta dálkasa mii sáhttá leat várálaš johtolagas, almmuha Vegnett maid Stáda geaidnodoaimmahat doaimmaha.

 – Lea gitta njeallje geardde stuorát várra geavvat lihkohisvuhtii ja roasmmohuvvat jus lea oađđindálkasa dahje oadjudallandálkasa váldán, muitala Álbmotdearvvašvuođa dutki Svetlana Skurtveit.

 

Ollugat vižže dálkasiid

Dálkkasregistara dieđuid vuođul vižže oktiibuot 500 000 olbmo unnimusat oktii garra dálkasa mii unnida bákčasiid (opioider). Birrasii 470 000 olbmo namuhuvvon agis vižže unnimusat oktii dálkasa mii lea oađđindálkkas dahje dálkasiid mat oadjudallet (benzodiazepina ja z-oađđindálkkas).

Dálkasat main lea stuorámus várra johtolagas leat opioidat, z-oađđendálkasat ja benzodiazepinat:

– Valium (diazepam)

– Imovane (zopiklon)

– Stilnoct (zolpidem)

– Sobril (oksazepam)

– Rivotril (klonazepam),

– Xanor (alprazolam)

– Mogadon (nitrazepam)

– Paralgin Forte/Pinex forte (kodein)

– Nobligan (tramadol),

– Dolcontin (morfin),

– OxyContin/OxyNorm (oksykodon)

Stuorámus várra lea jus seaguha dálkasiid eará dálkasiiguin mat gárihuhttet, alkoholain dahje narkotihkain. Lea maid várra jus váldá badjelmeare dálkasiid gárihuhttima dihte.

 

Ođđa rustet mainna isket

Geaidnopolitiijat bissehit eambbogiid geat leat gárrendilis vuodjimin dál go ovdal.

Geaidnopolitiijahoavda Runar Karlsen muitala váldosivvan go ollugat válddahallet lea go politiijat leat čavgen dan barggu, muhto sáhttá maid leat dan dihte go eambbogat vudjet gárrendilis dál go ovdal.

 – Mii gávdnat eanet vuddjiid johtolagas geat leat eará gárrendilis go alkohola sivas. Dat sáhttá leat dan dihte go leat buoridan vugiid ja geavahit Dräger DrugTest5000 maid válddiimet atnui diibmá, muitala Karlsen.

-Almmuhus-