Geassebáhkat bohte dán jagi easkka go skuvllat álge. Danne sirddii Guovdageainnu nuoraidskuvlla rektor otnáš skuvlabeaivvi baicca sáddogáddái.
Geassebáhkat bohte dán jagi easkka go skuvllat álge. Danne sirddii Guovdageainnu nuoraidskuvlla rektor otnáš skuvlabeaivvi baicca sáddogáddái.
– Mis lea juohke jagi oahpásnuvvan leamašan Čábardašjogas mii lea moadde kilomehtera eret gilis. Muhto dan jagi šattaimet rievdadit hoahpus báikkii. Ikte lei gávccat luohká ohppiin deaivvadeapmi Čábardašjogas. Doppe lei leamašan nu issoras báhkka ja ollu divrrit, nu ahte de mii hoahpus rievdadeimmet báikki, muitala Guovdageainno nuoraidskuvlla rektor Ellen J. Sara Eira.
Dehálaš oahpásnuvvat
Guovdageainnu nuoraidskuvlla rektor oaidná stuora dárbbu dakkár mátkkiide.
– Mun oainnán stuora dárbbu lágidit dakkár oahpásnuvvan mátkkiid. Go mis leat juohke jagi ođđa oahpaheaddjit, dasa lassin leat maid mánát geat lávkejit mánáidskuvllas nuoraidskuvlii. Doppe besset oahpásnuvvat, humadit ja mis lávejit stohkosat, čilge Guovdageainnu nuoraidskuvlla rektor Ellen J. S. Eira.
18 lieggagráda čázis
Dan jagi lea Guovdageainnu nuoraidskuvlla deaivvadanbáiki Boaronjárgga sáttogáttis. .
– Ii lean váttis gávdnat báikki go mis lea dás lahka fiinna sáttogáddi, ja oahppit besset vuojadit geat háliidit. Eat leat gal mihtidan čáhcetemperatuvrra, muhto ikte ledje muhtimat mihtidan ja lei leamašan 18 gráda. Dan gal jáhkán ahte dal gal lea várra beare galmmas vuojadit, muitala Sara Eira.
Buorit bearráigeahččit
Guovdageainnu nuoraidskuvllas leat 96 oahppi. Go diekkár mátkkiide vulget de ferte leat buorre gelbbolašvuohta sihkkarvuhtii go mánát galget čázi lahka.
– Váhnemat ledje dasa hui mielas ahte oahppit besset Boaronjárggas deaivvadit dán jagi. Mis leat ollu oahpan olbmot min skuvllas, mis leat moaddásiin gean lea heaggagádjun oahppu ja sii maid sáhttet earáid bagadallat ja oahpahit. Mii fertet leat dakkár mátkkiiguin várrogasat, čilge rektor.
Herskostallán ja stohkosat
Deaivvadeamis lea maid herskostallan ja stohkosat.
– Mii leat ožžon Guovdageainnu Rema 1000:s márffiid ja márfeláibbiid maiguin mii beassat doppe herskostallát. Ja mii lávet doppe hutkat vaikko makkárge stohkosiid, earret eará fierbmespábba mii lea hui somás stoagus sáttogáddis
Oahppit movttegat
Sihke oahppit ja váhnemat ledje movtta go báikki rievddai oanebottus.
– Ikte go rievdadeimmet báikki de ledje sihke váhnemat ja oahppit hui duđavaččat. Ii leat nu dávjá ahte dáppe besset mánát vuojadit. Mus lea buorre jáhkku ahte oahppit liikojit, oahppit leat leamašan duđavaččat daid ovddit jagiid maid min mátkkiiguin. Ja dat šađđá hui somá vuolgit dal ná fiinna dálkin olggos, loahpaha rektor Ellen J. Sara Eira.
GEAHČA EANET GOVAID DÁS: