Ráđđehus áigu várret 700 miljovnna ruvnno suohkaniidda ásahit oahpaheaddjenorpmaid čakčat.
– Ii oktage oahppi galgga gerget vuođđoskuvlla nu ahte ii leat oahppan čállit, lohkat ja rehkenastit albma ládje. Oahppit geat rahčet galget oažžut veahki árrat, vai eai báze ráiggit oahpahusas. Dasa dárbbahit eambbo buriid oahpaheddjiid, dadjá oahppo- ja integrerenministtar Jan Tore Sanner preassadieđáhusas.
Čakčii ásaha ráđđehus norpma oahpaheddjiide. De galget eanemusat leat 16 oahppi juohke oahpaheaddji nammii 1.-4. dásis, ja eanemusat 21 oahppi juohke oahpaheaddji nammii 5.-10. dásis.
Olu suohkanat dárbbahit eambbo oahpaheddjiid olahit dan. Danne evttoha ráđđehus várret 700 miljovnna ruvnno reviderejuvvon našuvnnalašbušehttii.
Nannet áŋgiruššama árrat
– 2015 rájes lea ráđđehus ovttasráđiid Risttalaš Álbmotbellodagain lohpidan mearkkašahtti supmiid eambbo oahpaheddjiid váste nuoramus dásiin. Logut čájehit ahte logut mannet rievttes guvlui. Joavkkuid sturrodat lea njiedjan, dadjá Sanner.
Lohpadus suohkaniidda dán jagi
Oktiibuot lea lohpiduvvon 1,4 miljárdda ruvnno. Dat lea 200 miljovnna ruvnno eambbo go diibmá. Dát galget juhkkojuvvot suohkaniidda 2018 čavčča.
Ráđđehusa reviderejuvvon našuvnnalašbušeahta evttohusa dihte gártet oktiibuot 2 300 oahpaheaddji čakčat.
