Mannan ija bulii viessu Deanus, ja politiijat leat ohcame dievddu gean ballet duššan buollimis.
Politiijat muitalit NTB:i gaskavahkku iđit ahte eai leat vel gávdnan dievddu, gii lea badjelaš 50-jahkásaš, gii orru viesus mii bulii gutnan.
Ii leat vejolaš vel iskat buollinsaji go lea ain hirbmat báhkas das.
Ohcet dievddu
Politiijat geahččaledje mannan ija gávdnat dievddu ságaide, muhto eai leat lihkostuvvan.
– Dievddu oapmahaččat leat ožžon dieđu dáhpáhusa birra. Juste dál eat dieđe buollinsiva birra maidege, muitala Finnmárkku politiijaguovllu operašuvdnajođiheaddji Gunnar Øvergaard VG:i.
Dutket buollima
Lei mannan idja, diibmu 01:45 go Finnmárkku politiijaide bođii diehtu ahte ásodat lei buollán Máskejogas, guhtta kilomehtera Deanušalddis eret.
Go heahteveahkit ollejedje báikái, de lei viessu jo buollán gutnan.
Operašuvdnajođiheaddji muitala TV2:i ahte leat jáddadeame buollima, ja politiijat dutket buollima sihke taktihkalaččat ja teknihkalaččat.
Ránnjá dieđihii buollima
Lei ránnjá gii orru nuppe bealde Deanu joga gii dieđihii buollima birra politiijaide.
– Eai leat nu máŋga viesu báikkis, mii sáhttá leat sivvan go viessu lei jo buollán gutnan go buollinčáskadeaddjit bohte báikái, muitala operašuvdnajođiheaddji Asgeir Aule Dagbladii.
(©NTB)
