Heahtedilleguovddážiin leat lassánan geavaheaddjit go buohtastahttá ovddit jagiid ektui.
Heahtedilleguovddážiin leat lassánan geavaheaddjit go buohtastahttá ovddit jagiid ektui.
Eai goasse leat ná olu olbmot ohcalan heahtedilleguovddážii ságastallamii ja ráđđádallamii, maŋŋel go leat vásihan veahkaválddálašvuođa. Dan čájeha Mánáid-, nuoraid- ja bearašdirektoráhta (Bufdir) ođđa statistihkka.
2016:s lei stuora lassáneapmi olbmuin geat fitne ságastallamis go buohtastahttá ovddit jagiid ektui, ja dál lea alimus lohkku 2005 rájes.
– Lassáneapmi beaiveságastallamis lea positiivvalaš, ja čájeha ahte olbmot árvvusatnet heahtedilleguovddážiid gelbbolašvuođa. Lea maid beroštahtti ahte leat lassánan beaivegeavaheaddjit, geain ii leat ovdal leamaš oktavuohta guovddážiiguin, ja oallugat dieđihit beallelačča dahje ovttasássi veahkaváldin. Dat čájeha ahte oallugin lea dárbu heahtedilleguovddážiid ságastallamii, go leat loahpahan oktavuođa ovttasássin dahje beallalaččain, dadjá Mánáid-, nuoraid-, ja bearašdirektoráhta direktevra Mari Trommald.
Dievddut vásihit eambbo psyhkalaš veahkaváldima
2016:s ledje 131 dievdoássi ja 205 dievddu ledje beaivegeavaheaddjit heahtedilleguovddážis, ja logut leat leamaš stabiila daid maŋemus jagiid, maŋŋel go čađahuvvui lágadeapmi heahtedilleguovddášfálaldagas 2010:s.
Iskkos maid Proba Samfunnsanalyse čađahii 2017:s, čájeha ahte dievddut leat duhtavaččat fállojuvvon fálaldagain heahtedilleguovddážis.
Iskkos čájeha maiddái muhtin báikkiin lea fálaldat heajut dievdduide go nissoniidda. Dasa lassin leat máŋgga sajis gaskaboddosaš visttiin.
Mánát heahtedilleguovddážiin vásihit boatka skuvlavázzimis ja mánáidgárddis
1490 máná orro heahtedilleguovddážiin 2016:s. Eatnašat bohte eatni fáru, ledje 36 máná geat ledje áhči fárus.
Raporteren čájehii positiivvalaš treanda, ahte leat eambbo heahtedilleguovddážat álggahan systemáhtalaš kártema mánáid veahkke- ja suodjalandárbbu ektui, ja ovttasbargu mánáidsuodjalanbálvalusain lea lassánan.
– Lea váivi go measta bealli mánáin guovddážiin vásihit ollislaččat dahje belohahkii boatka skuvllas dahje mánáidgárddis, dasa lea dávjjimus sivva máná sihkarvuohta, muhto maiddái guhkes mátkkoštanluodda ja váilevaš fievrridanvejolašvuohta. Liikká lea positiivvalaš ahte dál dávjjit go ovdal doalahuvvo ovttasbargu máná skuvllain dahje mánáidgárddiin, mii sáhttá váikkuhit ahte lea álkit gávdnat čovdosiid vai mánná beassá joatkit skuvllas dahje mánáidgárddis, lohká Trommald.
Diehtodoaibma
Doarjun dihte viidásit positiivvalaš ovdáneami heahtedilleguovddážiid fálaldagaid, lea direktoráhtta dál ráhkadeame digitála fágabagadeaddji gii galgá fálaldaga sisdoalu ja kvalitehta birra muitalit, mii boahtá guoskkahit visot osiid suohkana heahtedillefálaldagaid.
Direktoráhtta lea maiddái pláneme diehtodoaimma mii veahkaváldin lagas gaskavuođain lea ja makkár veahkkefálaldagat gávdnojit, sihke dievdduide ja nissoniidda.
