Viesuin Bergenis ja Oslos leat gávdnan ođđa vahádivri, muhto doaivumis gávdno «perlekre» nammasaš divri miehtá Norgga.
«Perlekre» gullá seamma sohkii go «sølvkre» ja «skjeggkre».
Disdaga dán vahkku gávdne Mycoteam bargit divrri sihke Bergenis ja Oslos.
– Dát čájeha ahte divri lea ollen bieđganit viidát, ja jáhkkimis dat gávdno miehtá Norgga, dadjá Johan Mattsson, Mycoteam fitnodaga fágahoavda.
Go divri lea aiddo fuomášuvvon, de dutkit eai vel dieđe nu ollu dan birra.
Muhto go gávdne divrri seamma sajis viesuin go «sølvkre» ja «skjeggkre», de lea muittuha «perlekre» hui ollu daid divrriid.
Mattsson jáhkká maid ahte divri lea guhká gávdnon Norggas, muhto lea badjelgehččojuvvon.
– Go divri lea measta čađačuovgi ja unnit go dat eará sullasaš divrrit, de jáhkán ahte olbmot leat badjelgeahččan dan. Muhto dat lea eahpitkeahttá sierra nálli, dadjá Mattsson.
Váttisvuođaid vistiide
– Earenoamážit «skjeggkre», muhto «sølvkre» maid dagaha stuora vahágiid visttiide. Nu ahte mii jáhkkit ahte «perlekre» maid lea seammalágan ja dagaha váttisvuođaid visttiide, dadjá Mattsson.
Dáid divrriid oktasaš mearka lea ahte dat háddjanit jođánit ja daid lea váttis jávkadit. Vistit mat leat lieggasat ja čavdásat, ja gos gávdno njuoskkas, lea dat buoremus maid dat divrrit dihtet.
