Bearjadaga rájes besset olbmot gullagoahtit Johan Kitti ođđaseamos lávlagiid, ja dasa son illuda. – Lean bargan skearruin golbma jagi, ja lea váldán áiggi bargat dainna. Viimmat beasan almmuhit dan, lohká Johan Kitti movttain.
Bearjadaga rájes besset olbmot gullagoahtit Johan Kitti ođđaseamos lávlagiid, ja dasa son illuda. – Lean bargan skearruin golbma jagi, ja lea váldán áiggi bargat dainna. Viimmat beasan almmuhit dan, lohká Johan Kitti movttain.
– Sámi buoremus lávlladahkki almmuha su njealját studioskearru bearjadaga, borgemánu 31. beaivvi, čállá Audioland preassadieđáhusas Johan Kitti ođđa skearroalmmuheami «Dolla» birra.
Njealját skearru
Son lea almmuhan máŋga skearru dan rájes go álggii almmolaččat lávlut.
Dál de luovvana su njealját skearru, «Dolla».
– Skearru lea eanemusat dovdduid birra, muhto leat maid lávlagat main lea politihkalaš sisdoallu, muitala Kitti.
Vuosttaš geardde politihkalaš lávlagat
Lea ge vuosttaš geardde go son almmuha guokte lávlaga main lea politihkalaš fáddá.
– Lean čállán lávlaga dan dili birra mii Sámis lea dál, gos ollugat šaddet heaitit boazodoalus. Nubbi lávlla lea sisabahkkemiid birra. Lean šaddan bajás boazodoalus ja lean oahppan álot atnit luonddu árvvus go dat váikkuha min eallimii, lohká Kitti.
Lávke musihkain ođđa hápmái
Johan Kitti, gii ássá Sujjaváris Ruoŧa beale Sámis, lohká leat ilus dál go skearru viimmat gárvánii.
Bearjadaga rájes besset olbmot gullat fas su musihka.
– Musihkka lea EDM hámis, mii lea earálágán go musihkka mii mus lei ovdal. Mun liikon EDM hápmái, ja lea leamaš hállu ráhkadit dán hámis musihka, lohká Kitti.
Skearrus lea Kitti ovttasbargan Daniel Isakseniin (ISÁK joavkku musihkkár) ja Klemet Anders Buljoin (Audioland buvttadeaddji).
– Árktalaš prinsa
Audioland čállá preassadieđáhusas ahte Johan Kitti hástala riikkarájiid, árbevieruid ja sámi pop-kultuvrra.
Badjelaš 15 jagi lea bargan sámi popmusihkain.
Son juoiggasta šuoŋaide mat jođánit darvánit muitui, ođđa skearrus mii lea hirpmus dego bávkkalmas, maid árktalaš prinsa, Johan Kitti, lea čállán.
Skearru lea gávdnamis digitála hámis buot Davviriikkain bearjadaga rájes.
