Sámediggi ja Gielda- ja ođasmahttindepartemeanta leat soahpan ođđa suohkanráji Hápmira ja Áhkánjárgga gaskka. Sámediggeráđđi Mikkel Eskil Mikkelsen lea duhtavaš čovdosiin, earret eará danne go šáddá nana julevsámi hálddašansuohkanin.
Sámediggi ja Gielda- ja ođasmahttindepartemeanta leat soahpan ođđa suohkanráji Hápmira ja Áhkánjárgga gaskka. Sámediggeráđđi Mikkel Eskil Mikkelsen lea duhtavaš čovdosiin, earret eará danne go šáddá nana julevsámi hálddašansuohkanin.
Ođđa suohkanrádji Hápmira ja Áhkánjárgga gaskka sohppojuvvui vuossárgga cuoŋománu 16. beaivvi
Ođđa Hápmir šaddá áidna suohkan mii hálddaša julevsámegiela olles riikkas, ja mii sáhttá fállat giellabálvalusaid iežas álbmogii.
– Dát lea nana ja ollislaš julevsámi suohkan, Hápmir lea guovddážis julevsámegiela ealáskahttimis. Midjiide lea deaŧalaš ahte suohkanis leat buorit eavttut dán deaŧalaš barggus, dadjá sámediggeráđđelahttu Mikkel Eskil Mikkelsen.
Sihkkarastit buriid čovdosiid
– Deaŧalaš lea ahte Hápmira suohkan oažžu vejolašvuođaid maid dárbbašit vai sáhttet ovdánit suohkanođastusa mihttomeriide dávistettiin. Sámediggái lea leamaš deaŧalaš sihkkarastit dan ahte goappaš suohkanat ođđa čovdosis ožžot vuolggasaji mii addá ceavzilvuođa ja nanusvuođa boahtteáiggis, dadjá sámediggeráđđi Silje Karine Muotka, geas lea Sámedikki regionálapolitihka ovddasvástádus.
Áigot sihkkarastit sámi vuoigatvuođaid Divttasvuonas
Sámediggi ja Divttasvuona báikkálašálgga leat deattuhan vejolašvuođaid čohkket julevsámi birrasa oarjjabeale guovlluin Divttasvuonas julevsámi birrasiin Hápmiris.
– Ovddit proseassain leat sámi guovllut Divttasvuonas identifiserejuvvon ja dáid guovlluid historjjálaš geavaheapmi lea geahčaduvvon. Dat ođđa suohkanrádji dagaha ahte sámi árbevirolaš guovllut čohkkejuvvojit ovtta ja seamma suohkanii. Dainna lágiin šattašii sámi beroštumiid hálddašeapmi eanet ollislaš, dadjá Mikkel Eskil Mikkelsen.
Čoahkkimis departemeanttain ságastuvvui maiddái movt suohkana sámi ássit galget bisuhit vuoigatvuođaid mat čuvvot suohkanhálddašanguovlluid, go oarjjabeale guovllut Divttasvuonas dál galget gullat Áhkánjárgga suohkanii.
– Dán min áigut čuovvulit viidáseappot departemeanttain ja Áhkánjárgga suohkaniin. Ii sáhte leat nu ahte ássit masset vuoigatvuođaid suohkanráji rievdademiid geažil, dadjá Mikkelsen loahpas.
