Kevin André Boine ja DJ Biti leaba dán jagaš artisttat Verddefeasttas Buvrovuonas. Lágideaddjit sávvet deavdit feastaviesu.
Kevin André Boine ja DJ Biti leaba dán jagaš artisttat Verddefeasttas Buvrovuonas. Lágideaddjit sávvet deavdit feastaviesu.
Nu go juohke lávvordaga Verddeturneringa oktavuođas láve, de lea dán jagi maid konsearta eahkes, Buvrovuonas Flerbrukshusas. Doppe galgá Kevin André Boine čuojahit ealli musihka, ja DJ Biti galgá lávlagiid čuojahit.
Ealli musihkka
Konseartta lágida Verddelaget, gii maid lágida Verddeturneringa. Anne Biret Bæhr lea okta lágideddjiin, ja son lea hui ilus beassat sámi musihka čájehit mearragáttis.
– Lea somá go ođđa sámi násti boahtá, ja lea hui somá go lea veaháš sámi musihkka dáppe mearragáttis, go dat ii leat nu dávjá ahte dat dáhpáhuvva. Mii leat veahá geahččalan ođastit dál, go olbmot háliidit ealli musihka maid, ja dan lea somá geahččalit, muitala Anne Biret Bæhr.
Čáhket 500 olbmo
Sii eai leat ovdagihtii vuovdán bileahtaid, ja Bæhr ii dieđe muitalit movt bileahttajohtu šaddá.
– Sávvamis bohtet olu olbmot, mii lávet beaivet easka álgit vuovdit bileahtaid. Dat lávejit birrasiid 400 olbmo dan feasttas, muhto vissui čáhket lagabui 500 olbmo, ja de gal lea oba dievva, lohka lágideaddji.
Deatnulaš Kevin André Boine šattai dovddusin go searvvai “Norske Talenter” gilvui TV2žis, diimmá čavčča. DJ Biti lea Kárášjohkalaš DJ gii maid čuojaha sámi musihka. Konsearttas lea ahkemearri 18 jagi.
