Ođđa geaidnu ii dagat mátkki oaneheabbon, muhto guhkibun.
Ođđa olggut riddoriikageaidnu gaskal Álttá ja Fálesnuori gártá máksit čieža miljárdda ruvnno ja šaddá guhkit go dálá riikageainnut.
Dat lea konklušuvdna Stáda geaidnodoaimmahaga guorahallamis man ráhkadedje Stuoradikki meannudeami nationála fievrridanplána vuođul diibmá.
Doppe siđai eanetlohku fievrridanlávdegottis ahte ferte oaidnit vejolašvuođa ásahit olggut riddoriikageainnu láhčin dihte dili eambbo oljoaktivitehtii ja ođđa ealáhusovdáneapmái.
Jotkkolaš luodda
Stáda geaidnodoaimmahagas lea vuolggasadji dálá fylkkageainnut gaskal Leibotnvatn E6 Álttás ja Fálesnuori šaldi riikkageaidnu 94:s.
Gaskal unna Liidnavuonaža Álttás ja Jiepmaluovtta Fálesnuori suohkanis ii leat oktavuohta dál, ja dakko lea dárbu bidjat tunealla vai oažžu jotkkolaš olggut riddoriikageainnu.
Ođđa jotkkolaš luodda gaskal Leirbotnvatn ja Fálesnuori šalddi lea rehkenastojuvvon máksit gaskal 6700 ja 7800 miljovnna ruvnno.
Vaikko rehkenastin lea oalle sálttis, de oaivvilda Stáda geaidnodoaimmahat ahte addet buori gova ođđa riddoriikageainnu investerendásis.
Guhkit mátkkoštanáigi
Vaikko lea ođđa geaidnu mas ii dárbbat feargga váldit, de ii oano mátkkoštanáigi Álttá ja Hámmárfeastta gaskka.
Leirbotnvatn E6 ja Fálesnuori šalddi riikageainnu 94:i gaska lea 83,5 kilomehtera dál ja mátkkoštanáigi rehkenastojuvvo 65 minuhta.
Ođđa olggut riddoriikageaidnu šaddá 95 kilomehtera guhku ja mátkkoštanáigi gártá 91 minuhta.
Dušše muhtun čuođi olbmui guovllus šaddá buoret johtinfálaldat, ja Stáda geaidnodoaimmahat ii oainne ahte ođđa geainnus boahtá leat nu stuora mearkkašupmi ealáhusdoaimma ovdáneapmái.
