Riddu Riđđu feastiválas almmuhedje Sámi allaskuvlla ofelašdoaimma ođđa ofelaččaid.
Riddu Riđđu feastiválas almmuhedje Sámi allaskuvlla ofelašdoaimma ođđa ofelaččaid.
Dán jagaš ofelaččat leat:
Knut Mikkel Hætta, 20 jagi, eret Mieronis ja lea máŋga jagi orron Kragerøs. Son lea davvisápmelaš ja liiko spáppa čiekčat.
– Mun gullen muhtun olbmás doaimma birra, nu ahte mun de isken dan ja mu mielas orui gelddolaš ja mun de mearridin ohcat dasa, muitala son.
*/
Ole Nicklas Mienna Guttorm, 20 jagi, eret Guovdageainnus. Son lea maid davvisápmelaš. Son lea bargan mánáidgárddis ja su lei ovccijahkásaččan okta dain váldorollain Guovdageainnu stuimmiid filmmas.
– Go riŋgejedje munnje ja jerre áiggun go ofelažžan, de vástidin jua ovttatmanos. In dárbbašan jurddašan áiggi dasa, lohká son.
Oda Kjær Eriksen,18 jagi, eret Ørnesas, Nordlánddas. Son lea Julevsápmelaš. Son berošta vuodjamis ja bargá mánáid vuodjan hárjeheaddjin.
Maja Sofie Larsen Fjellstrøm, 20 jagi, eret Steinkjæras ja orru Snoasas. Son lea máttasápmelaš ja lea bargan máttasámegiela giellabargin mánáidgárddis. Maja Sofie Larsen Fjellstrøm muitala ahte háliidii ofelašdoibmii vai beassa oahpahit norgalaččaide sámi kultuvrra birra.
(Ášši joatká gova vuolabealde)
Sii leat ekspearttat
Sámi allaskuvlla ofelašdoaimma jođiheaddji Risten Länsman muitala ahte ofelašdoaibma ii galgga buhtadit dan dábálaš oahpahusa maid skuvllat leat geatnegáhtton addit.
– Ofelaččaid bargu šaddá movttiidahttit eará ohppiid oahppat sámi kultuvrra, servvodaga ja sámi nuoraid dili birra.
Länsman lohká sii leat ekspearttat justa dain fáttáin go sii leat bajásšaddan dan dilis, ja eai skuvllat sáhte seamma láhkai sáhttet.
– Ođđa ofelaččat váldet maiddái oahpu boahtte skuvlajagi Sámi allaskuvllas, nu ahte sin gelbbolašvuohta maiddái lea kvalitehta sihkkarastojuvvon, muitala son.
Doaibman 2004 rájes
Dálá ofelaččat leat 13. joavku geat galget čuovvovaš jagi johttit viidát deaivvadan dihte eará nuoraiguin ja sii fitnet skuvllain ja eará arenain gos leat nuorat.
– Ofelaččat logaldallet vuosttažettiin joatkkaskuvllain miehtá Norgga, muhto sáhttet maid logaldallat eará skuvllain, oahpaheaddji studeanttaide ja doppe gos lea dárbu eanet dieđuide sámiid birra, lohká Länsman.
