Ođđa máksinvuohki lea hirbmosit lassánan Norggas. Birrasiid 200 000 norgalačča geavahit koartta dainna vugiin, juohke beaivvi, dieđiha kommersiála Vipps jođiheaddji Vegar W. Heir.
Birrasiid 4 miljovnna koartta maiguin sáhttá máksit nu ahte dušše guoskkeha máksinterminála olggobeali. Buot ođđa koarttain maid báŋkkut sáddejit dál, lea dat ođđa máksinvejolašvuohta.
– Dál sáhttá juohke supmi ovddas máksit dainna lágiin, muhto jus lea badjel 200 ruvnno ovddas gávppašan, de ferte deaddit vel PIN-koda. Geasset oinniimet ahte dát máksinvuohki lassánii hirbmosit, ja norgalaččat leat jođánat rievdadit dábi ođđa teknologiijain, lohká Heir.
Boahtte jagi cuoŋománu lassána máksinrádji 400 ruvdnui nu ahte ii dárbbat deaddit PIN-koda. De navdet dan máksinvuogi lassánit vel eanet.
Dál lea gaskamearálaš máksinsupmi birrasiid 150 ruvnno.
Jođánis vuohki máksit
Heir oaivvilda olbmuid válljet dáinna vugiin máksit go dat manná ollu jođáneappot, ja dat lea sihkar ja álki.
– Gaskamearálaš gávppašansupmi rámbuvrras lea vuollel 400 ruvnno, ja de sáhttet kundarat máksit vel jođáneappot go ovdal. Mii diehtit ahte manná ovcci sekundda jođáneappot dáinna vugiin máksit, ovdalii go coggat koartta máksinterminálii ja deaddit PIN-koda. Mii seastit ollu vuordimiid servvodagas. Ruhtabeahtturiska unna maid, go ii dárbbaš nu dávjá deaddit PIN koda maid suollagat sáhttet oaidnit, lohká Heir.
