– Mii dáhttut nannet oahpponeavvuid sámegillii, ja dál leat ovdánahttime digitála oahppolávddi sámegillii, dadjá Solum Bokvennen doaimmaheaddji Per Jonas Kalvemo.
Solum Bokvennen lágádus lea almmuhan ođđa oahpponeavvuid lullisámegillii. Dát lea jurddašuvvon ohppiide geain lea lullisámegiella nubbegiellan vuođđoskuvlla 8. luohkás gitta joatkkaskuvlla 1. jahkái.
Buvttadusas leat sihke lohkangirji, bargogirji ja maiddái digitála resurssat, nu go oahpaheaddjebagadus, jietnagirji ja bargobihtát mat leat čadnon jietnagirjái. Girjjit leat nuvttá skuvllaide ja institušuvnnaide main leat oahppit geat háliidit oahppat lullisámegiela.
Kalvemo muitala lágádusa bealis sii leat duhtavaččat go viimmat besse almmuhit dan barggu, ja sávvet dan boahtit ávkin olusiidda.
– Min mielas galggaše gávdnot buorit oahpponeavvut sámegillii. Min lágádus lea maid ovddideame digitála oahppolávddi sámegillii, j prošeavtta namma lea «Skolum». Dat prošeakta almmuhuvvo ođđajágimánu dahje guovvamánu, dadjá Solum Bokvennen doaimmaheaddji Per Jonas Kalvemo preassadieđáhusas.
