Mannan vahkkoloahpa lágiduvvui Viddafestivalen Guovdageainnus, gos olu beakkán artisttat ledje čuojaheame. Lágideddjiid mielas manai nu bures, ahte leat juo jurddahišgoahtán boahtte festivála birra. GEAHČA GOVVARÁIDDU DOALUIN!
Mannan vahkkoloahpa lágiduvvui Viddafestivalen Guovdageainnus, gos olu beakkán artisttat ledje čuojaheame. Lágideddjiid mielas manai nu bures, ahte leat juo jurddahišgoahtán boahtte festivála birra. GEAHČA GOVVARÁIDDU DOALUIN!
Mannan vahkkoloahpa lágiduvvui Viddafestivalen Guovdageainnus, gos olu beakkán artisttat ledje čuojaheame. Guovdageainnu Thon Hotel, mii lea lágideaddji, lea hui duhtavaš festiválain, go ledje measta buot bileahtaid vuovdán.
– Mii leat hui duhtavaččat, lei sáhttit veahá bivvaleabbo, ja lei sáhttit veahá stuorát, muhto olbmot leat duhtavaččat. Olbmot leat movttegat, lea hui buorre lágidit juoidá Guovdageainnus gosa olbmot gillejit vuolgit, lohká lágideaddji Charlotte Eira.
Hotealla dievvan áigá
Hotealla olggobeallai ledje ceggejuvvon stuora lávut gos festivála lei. Lávuid siste ledje bárat ja čohkkánsajit, ja maiddái lávdi.
Festivála lágideaddjit leat áigá almmuhan festivála ja artisttaid, ja hoteallalanjat leat maid áigá dievvan. Dat maid muitala ahte eai leat dušše Guovdageainnu olbmot festiválas, muhto olbmot ledje guhkkin boahtán.
– Min lanjat leat dievvan máŋga mánu áigi juo, muitala Eira. Son muitala ahte bearjadaga ledje vuovdán sullii 550 bileahta, ja lávvordaga ledje vuovdán buot, 650 bileahta.
Beakkán artisttat
Beakkán Norgga joavku DDE lei vuosttaš háve Guovdageainnus čuojaheame, ja lohket ahte sii leat hui bures váldon vuostá. Lassin sidjiide ledje maid Freddy Kalas, Rednex ja Morgan Sulele ja Innertier lávddi alde guoimmuheame. Ledje aŋkke sámi joavkkut mat besse álggahit ja loahpahit festivála. Johkamohki artista Kitok álggahii festivála ja Kárášjoga joavku Felgen Orkester fas loahpahii.
– Ii leat nu dávjá artisttat besset lávus čuojahit, gos sápmelaččat vel juiget. Dieđusge lei maid sáhka ruđas, muhto mii eat livčče nagodan dán lágidit buori veahki haga. Dasa lassin eat leat báljo bargan eará dan maŋemuš jahkebeali, go plánet dán festivála, lohká Charlotte Eira.
Boahtte jagi soaitá fas
Eira lohká ahte dát orru nu buorre festivála ahte sii leat jo jurddašišgoahtán boahtte jagi birra.
– Dat orru goit manname nu bures, jáhkán ahte mii áigut fas geardduhit dán. Leat unna áššážat maid sáhttit buoridit boahtte hávvái, muhto dál mii leat oahppan. Jáhkán mii boahtit juste «nullii», nu ahte gokčat goluideamet, lohká lágideaddji.
Geahča govvaráiddu doaluin DÁPPE.
