Norgga 15-jahkásaččat čohkkájit guokte goalmmádasoasi beaivvis, ja 9-jahkásaš bártnážat lihkadit dál olu unnit go ovdal.
Norgga 15-jahkásaččat čohkkájit guokte goalmmádasoasi beaivvis, ja 9-jahkásaš bártnážat lihkadit dál olu unnit go ovdal.
Dát leat váldogávdnodat viiddis iskkadeamis maid Norgga valáštallanallaskuvla, Norges idrettshøgskole (NIH), lea čađahan ovttas Álbmotdearvvašvuođainstituhtain.
– Logut leat fuolastahtti, lohká Jostein Steene-Johannessen NIH valáštallanmedisiinnalašfágaid sekšuvnnas.
Lea forskning.no gii čállá iskkadeami birra, mii dál lea čađahuvvon goalmmát geardde 2005 rájes.
Iskkadeami gohčodit UngKan, ja iskkadeamis leat mielde badjelaš 9000, 6-, 9-, ja 15-jahkásaš máná ja nuorat.
Mihtidan man olu lihkadit
Iskkadeami oktavuođas bidje diibmá badjelaš 3000 mánnái mihtidanapparáhta, mii mihtidii áiggi go lihkadedje ja áiggi go čohkkájedje jaska ovtta beaivvis.
Oasseváldit eai oađđán gal mihtidanápparáhtain.
Dutkit lohket forsning.no ahte bohtosat leat hui čielgasat:
Mánát ja nuorat eai lihkat
dál eambbo go ovdal. 9-jahkásaš bártnážiid aktivitehtadássi lea baicce njiedjan.
Iskkadeamis ii boađe ovdan manne dán agi mánát dál lihkadit unnit.
Steene-Johannessen lohká forskning.no siidui ahte dutkamuša bohtosiid geažil berrejit skuvllat láhčit mánáide ja nuoraide eanet vejolašvuođaid searvat fysalaš doaimmaide skuvlabeaivvis.
Čohkkájit badjel beali beaivvis
Iskkadeapmi čájeha ahte gaskamearalaččat čohkkájit 15-jahkásaš nuorat 73 proseantta beaivvis.
– Go 15-jahkásaš čohkká jaska 73 proseantta beaivvis, de berre juogalágan doaimma bidjat johtui njulget dán, oaivvilda Steene-Johannesen.